திருவலம் அருகே நடந்த 3 பேர் கொலையில் துப்புதுலக்கிய போலீசாருக்கு பாராட்டு சான்றிதழ் - போலீஸ் சூப்பிரண்டு வழங்கினார்

சிப்காட்(ராணிப்பேட்டை), 

ஊரடங்கை முன்னிட்டு சிப்காட் போலீசார் சீக்கராஜபுரம் பகுதியில் கடந்த மாதம் ரோந்து பணியில் ஈடுபட்டிருந்த போது அங்கு கும்பலாக இருந்த சிலரை பிடித்து விசாரணை நடத்தினர். அப்போது இவர்களும் மேலும் சிலரும் சேர்ந்து திருவலம் அருகே 3 பேரை கொலை செய்து புதைத்திருப்பது தெரிய வந்தது. இதையடுத்து கொலை செய்து புதைக்கப்பட்ட 3 பேரின் உடல்களும் தோண்டி எடுக்கப்பட்டது.

சிப்காட் போலீசார் பிடித்த 3 பேருடன் இந்த கொலை சம்பவத்தில் ஈடுபட்ட மேலும் 3 பேர் கைது செய்யப்பட்டனர். 3 பேரை கொலை செய்ததை முதலில் தங்களின் விசாரணை மூலம் துப்பு துலக்கிய ராணிப்பேட்டை துணை போலீஸ் சூப்பிரண்டு கீதா, ராணிப்பேட்டை இன்ஸ்பெக்டர் திருநாவுக்கரசு, சிப்காட் சப்- இன்ஸ்பெக்டர் வசந்த், போலீஸ்காரர்கள் சதீஷ், வினோத் ஆகியோருக்கு ராணிப்பேட்டை மாவட்ட போலீஸ் சூப்பிரண்டு மயில்வாகனன் நேற்று பாராட்டு சான்றிதழ் மற்றும் பரிசு வழங்கி பாராட்டினார்.