கொரோனா தொற்றால் பாதிப்பு: ரெயில்வே பாதுகாப்பு படை சப்-இன்ஸ்பெக்டர் உள்பட 3 பேர் வீடு திரும்பினர்

தஞ்சாவூர், 

கொரோனா தொற்றால் பாதிக்கப்பட்டு குணமடைந்த ரெயில்வே பாதுகாப்பு படை சப்-இன்ஸ்பெக்டர் உள்பட 3 பேர் வீடு திரும்பினர். இதன் மூலம் தஞ்சை மாவட்டத்தில் வீடு திரும்பியவர்களின் எண்ணிக்கை 66 ஆக உயர்ந்துள்ளது.

72 பேர் பாதிப்பு

தஞ்சை மாவட்டத்தில் கொரோனாவால் 72 பேர் பாதிக்கப்பட்டனர். இவர்கள் அனைவரும் தஞ்சை மருத்துவக்கல்லூரி மருத்துவமனையில் அனுமதிக்கப்பட்டு இருந்தனர். இவர்களில் நேற்று முன்தினம் வரை 64 பேர் குணம் அடைந்து வீடு திரும்பினர்.

இந்த நிலையில் பாபநாசம், பேராவூரணி பகுதிகளில் தலா ஒருவர் குணம் அடைந்ததையடுத்து நேற்று வீடு திரும்பினர். இதேபோல் தஞ்சையில் சிகிச்சை பெற்று வந்த சென்னையை சேர்ந்த ரெயில்வே பாதுகாப்பு படை போலீஸ் சப்-இன்ஸ்பெக்டரும் குணம் அடைந்ததையடுத்து நேற்று வீடு திரும்பினார்.

6 பேர் சிகிச்சை

குணம் அடைந்து வீடு திரும்பியவர்களை தஞ்சை மருத்துவக்கல்லூரி முதல்வர்(பொறுப்பு) டாக்டர் மருததுரை, சிறப்பு அலுவலர் டாக்டர் குமுதா லிங்கராஜ் மற்றும் டாக்டர்கள் பழங்கள் வழங்கி வழியனுப்பி வைத்தனர். மேலும் குணம் அடைந்து வீடு செல்லும் நபர்கள் தொடர்ந்து 14 நாட்கள் அவரவர் இல்லத்தில் தங்களை தனிமைப்படுத்திக் கொள்ளுமாறு அறிவுறுத்தப்பட்டனர்.

தற்போது தஞ்சை மருத்துவக்கல்லூரி மருத்துவமனையில் 6 பேர் மட்டுமே சிகிச்சை பெற்று வருகிறார்கள். இதன் மூலம் மாவட்டத்தில் குணம் அடைந்து வீடு திரும்பியவர்களின் எண்ணிக்கை 66 ஆக உயர்ந்துள்ளது.

காய்ச்சல், சளி, இருமல் ஆகிய அறிகுறிகளுடன் தஞ்சை மருத்துவக்கல்லூரி மருத்துவமனையிலும், ராசா மிராசுதார் அரசு மருத்துவமனையிலும், சோதனை மையங்களில் தனிமைப்படுத்தப்பட்டு மற்றும் சிகிச்சை பெற்ற 13 ஆயிரத்து 384 பேர்களுக்கு கொரோனா பரிசோதனை செய்யப்பட்டது. இதில் 13 ஆயிரத்து 65 பேருக்கு அறிகுறி இல்லை என தெரிய வந்துள்ளது. 319 பேருக்கு பரிசோதனை முடிவுகள் வர வேண்டி உள்ளது.