விளாத்திகுளம் அருகே, கணவரால் தீ வைத்து எரிக்கப்பட்ட பெண் சாவு - கொலை வழக்காக மாற்றம்

விளாத்திகுளம்,

விளாத்திகுளம் அருகே வேம்பார் ரோஜாபாளையத்தைச் சேர்ந்தவர் மாடசாமி (வயது 57). கூலி தொழிலாளி. மனைவியை பிரிந்து வாழ்ந்த இவர் லட்சுமி (45) என்பவரை 2-வதாக திருமணம் செய்தார். லட்சுமியும் ஏற்கனவே முதல் கணவரை பிரிந்து வாழ்ந்தவர். லட்சுமி, கட்டிட தொழிலாளியாக வேலை செய்தார்.

இந்த நிலையில் மாடசாமி அடிக்கடி மது குடித்து விட்டு, மனைவியின் நடத்தையில் சந்தேகப்பட்டு தகராறு செய்து வந்தார். கடந்த 23-ந்தேதி இரவில் கணவன்-மனைவிக்கு இடையே மீண்டும் தகராறு ஏற்பட்டது.

தீ வைத்து எரிப்பு

அப்போது ஆத்திரம் அடைந்த மாடசாமி தன்னுடைய மனைவியின் மீது மண்எண்ணெய் ஊற்றி தீ வைத்தார். இதில் பலத்த காயம் அடைந்த லட்சுமி அலறியடித்து வெளியே ஓடி வந்தார். உடனே அக்கம்பக்கத்தினர் அவரை காப்பாற்றி சிகிச்சைக்காக தூத்துக்குடி அரசு ஆஸ்பத்திரியில் அனுமதித்தனர்.

அங்கு அவருக்கு தீவிர சிகிச்சை அளிக்கப்பட்டது. ஆனாலும் சிகிச்சை பலனின்றி லட்சுமி நேற்று காலையில் பரிதாபமாக உயிரிழந்தார். இதையடுத்து சூரங்குடி போலீசார் மாடசாமி மீதான கொலைமுயற்சி வழக்கை கொலை வழக்காக மாற்றி அவரை கைது செய்தனர்.