டாஸ்மாக் கடையில் ‘ஓசி’யில் மதுகேட்டு ரகளை மதுபோதையில் தள்ளாடியபடி ஆபாசமாக பேசும் குமரி சப்-இன்ஸ்பெக்டர்

பத்மநாபபுரம், 

டாஸ்மாக் கடையில் ‘ஓசி‘யில் மது கேட்டு ரகளை செய்த குமரி சப்-இன்ஸ்பெக்டர், மதுபோதையில் தள்ளாடியபடி ஆபாசமாக பேசும் வீடியோ காட்சி சமூக வலைதளங்களில் வைரலாக பரவுகிறது.

மதுபோதையில் சப்-இன்ஸ்பெக்டர்

கொரோனா ஊரடங்கின் இடையே சில தளர்வின் போது சமீபத்தில் டாஸ்மாக் கடையும் திறக்கப்பட்டது. அப்போது, மதுக்கடையில் கூட்டம் அலைமோதியது. சமூக இடைவெளியில் நின்று மதுவாங்குவதற்காக அங்கு பாதுகாப்பு பணியில் ஈடுபட்ட போலீசார் நடவடிக்கை எடுத்தனர்.

வைரலாக பரவுகிறது

அப்போது, சிறப்பு சப்-இன்ஸ்பெக்டர் ஒருவர் மதுபோதையில் டாஸ்மாக் கடையில் தள்ளாடியபடி பணியில் ஈடுபட்ட சம்பவம் தற்போது வீடியோவாக சமூக வலைதளங்களில் வைரலாக பரவி வருகிறது.

அதாவது, குமரி மாவட்டத்தில் பத்மநாபபுரம் பகுதியில் உள்ள ஒரு டாஸ்மாக் கடை நுழைவாயில் முன்பு சீருடையுடன் சிறப்பு சப்-இன்ஸ்பெக்டர் பணியில் இருக்கிறார். அந்த சமயத்தில், மதுபோதையில் தள்ளாடியபடி உளறுகிறார். அவரை ஒருவர் செல்போன் மூலம் வீடியோ எடுக்கிறார். இதனை பார்க்கும் அவர், என்னை யாரும் ஒன்றும் செய்ய முடியாது என நிதானமின்றி பேசுகிறார். மேலும், ஓசியில் நான் மது கேட்கவில்லை என்று கூறும் அவர் மதுக்கடைக்கு வரும் மதுபிரியர்களிடம் ஆபாசமாக பேசுகிறார். இந்த காட்சி சுமார் 5 நிமிடங்கள் ஓடுகிறது.

ஓசியில் மதுகேட்டு ரகளை செய்ததால், சிறப்பு சப்-இன்ஸ்பெக்டரின் நடத்தையை டாஸ்மாக் கடையில் உள்ள ஊழியர் ஒருவர் வீடியோ எடுத்ததாக தெரிகிறது. இத்தகைய குற்றச்சாட்டுக்குள்ளான சிறப்பு சப்-இன்ஸ்பெக்டர், சக போலீஸ்காரர் ஒருவருடன் கட்டிப்புரண்டு சண்டை போட்டதாக ஏற்கனவே இடைநீக்கம் செய்யப்பட்டவர் என்பது குறிப்பிடத்தக்கது.