பெரிய மார்க்கெட்டில் மீண்டும் காய்கறி கடைகள் திறப்பு

புதுச்சேரி,


புதிய பஸ் நிலையத்தில் இடவசதி இருந்ததால் கட்டங்கள் வரைந்தும், தடுப்புகள் அமைத்தும் வியாபாரம் நடந்து வந்தது. மக்களும் தடையின்றி வந்து சமூக இடைவெளியை பின்பற்றி காய்கறிகளை வாங்கிச்சென்றனர். கடந்த 2 மாதங்களாக இதே நிலை நீடித்தது.

இந்தநிலையில் ஊரடங்கில் பல்வேறு கட்டுப்பாடுகள் தளர்த்தப்பட்டன. இதையடுத்து பஸ்களை இயக்க புதுவை அரசு அனுமதி அளித்தது. ஆனால் சமூக இடைவெளியை பின்பற்றி 20 பயணிகளை மட்டுமே ஏற்றிச் செல்ல முடியும் என்பதால் தனியார் பஸ் உரிமையாளர்கள் பஸ்களை இயக்க மறுத்து விட்டனர். இதனால் அரசு பஸ்கள் மட்டும் உள்ளூருக்குள் சென்று வருகின்றன.

தற்போது கடலூர் போன்ற வெளியூர்களுக்கு பஸ்களை இயக்க அரசு திட்டமிட்டுள்ளதாக தெரிகிறது. இதையொட்டி பஸ் நிலையத்தில் தற்காலிகமாக இயங்கி வந்த காய்கறி கடைகள் அரசு உத்தரவின்பேரில் மீண்டும் பெரிய மார்க்கெட்டுக்கு மாற்றப்பட்டன. நேற்று முதல் வழக்கம்போல் அங்கு காய்கறி கடைகள் செயல்பட தொடங்கின.