விஷம் குடித்து தற்கொலை முயற்சி: கள்ளக்காதலன் சாவு; காதலிக்கு தீவிர சிகிச்சை

கும்பகோணம், 

கும்பகோணத்தில், லாட்ஜில் விஷம் குடித்து தற்கொலைக்கு முயன்ற கள்ளக்காதலன் சிகிச்சை பலனின்றி பரிதாபமாக இறந்தார். உயிருக்கு ஆபத்தான நிலையில் காதலிக்கு தீவிர சிகிச்சை அளிக்கப்பட்டு வருகிறது.

கள்ளக்காதல் ஜோடி

நாகை மாவட்டம் மயிலாடுதுறை அருகே உள்ள வில்லியநல்லூர்-உச்சிதமங்கலம் மெயின் ரோட்டை சேர்ந்தவர் மகாலிங்கம். இவரது மகன் செல்வம்(வயது 23). கொத்தனார் வேலை செய்து வந்தார். இவருக்கு இன்னும் திருமணம் ஆகவில்லை.

தஞ்சை மாவட்டம் வீரமாங்குடியை சேர்ந்தவர் ஜெயா(40). இவருக்கு திருமணமாகி 2 குழந்தைகள் உள்ளனர். கணவரை விட்டு பிரிந்து வாழ்ந்து வரும் ஜெயா, செல்வம் கொத்தனார் வேலைபார்த்த இடத்தில் சித்தாளாக வேலை பார்த்து வந்தார். இதனால் இருவருக்கும் இடையே பழக்கம் ஏற்பட்டு நாளடைவில் இது கள்ளக்காதலாக மாறியது.

விஷம் குடித்து தற்கொலைக்கு முயற்சி

கள்ளக்காதலர்கள் இருவரும் கும்பகோணத்தில் உள்ள ஒரு லாட்ஜில் அடிக்கடி தங்கி தனிமையில் சந்தித்து வந்தனர். இருவரும் திருமணம் செய்து கொண்டு வாழ முடிவு செய்தனர். இதற்கு இருவரின் குடும்பத்தினரும் எதிர்ப்பு தெரிவித்ததால் மனம் உடைந்த கள்ளக்காதல் ஜோடி தற்கொலை செய்து கொள்ள முடிவு செய்து வழக்கம்போல் தாங்கள் தங்கும் லாட்ஜில் அறை எடுத்து தங்கினர்.

அங்கு இருவரும் விஷம் குடித்தனர். விஷம் குடித்த இவர்கள் தங்கி இருந்த அறையில் இருந்து தங்களை காப்பாற்றுமாறு சத்தம் போட்டுள்ளனர். அவர்களது சத்தம் கேட்டு அங்கு சென்ற லாட்ஜ் ஊழியர்களிடம் அவர்கள், தாங்கள் விஷம் குடித்து விட்டதாகவும், தங்களை காப்பாற்றுமாறும் கூறினர்.

காதலன் சாவு; காதலிக்கு தீவிர சிகிச்சை

இதுகுறித்து லாட்ஜ் ஊழியர்கள் கும்பகோணம் மேற்கு போலீசாருக்கு தகவல் தெரிவித்தனர். தகவலின் பேரில் போலீசார் சம்பவ இடத்திற்கு விரைந்து வந்து இருவரையும் மீட்டு கும்பகோணம் அரசு மருத்துவமனையில் சேர்த்தனர். அங்கு இருவருக்கும் தீவிர சிகிச்சை அளிக்கப்பட்டு வந்தது. இந்த நிலையில் நேற்று காலை சிகிச்சை பலனின்றி செல்வம் பரிதாபமாக இறந்தார்.

உயிருக்கு ஆபத்தான நிலையில் இருந்த ஜெயா மேல் சிகிச்சைக்காக தஞ்சை மருத்துவகல்லூரி மருத்துவமனைக்கு அனுப்பி வைக்கப்பட்டார். அங்கு அவருக்கு தீவிர சிகிச்சை அளிக்கப்பட்டு வருகிறது. இதுகுறித்து செல்வத்தின் தந்தை மகாலிங்கம் கொடுத்த புகாரின் பேரில் கும்பகோணம் மேற்கு போலீசார் வழக்குப்பதிவு செய்து விசாரணை நடத்தி வருகின்றனர்.