கோவை வெள்ளலூரில் நவீன முறையில் குப்பைகளை மக்க வைக்கும் திட்ட பணிக்கான பூமி பூஜை அமைச்சர் எஸ்.பி.வேலுமணி தொடங்கி வைத்தார்

கோவை,

கோவை வெள்ளலூரில் ரூ.60.11 கோடியில் நவீன முறையில் குப்பைகளை மக்க வைக்கும் திட்டத்துக்கான பணிகளை பூமிபூஜை செய்து அமைச்சர் எஸ்.பி.வேலுமணி தொடங்கி வைத்தார்.

வெள்ளலூர் குப்பை கிடங்கு

கோவை மாநகராட்சி வெள்ளலூர் குப்பை கிடங்கில் ஸ்மார்ட் சிட்டி திட்டத்தின் கீழ் ரூ.60.11 கோடியில் குப்பைகளை நவீன முறையில் மக்க வைக்கும் (பயோ மைனிங் முறை) பணிக்கு பூமி பூஜை நடந்தது. கோவை மாவட்ட கலெக்டர் ராஜாமணி, மாநகராட்சி தனி அதிகாரி ஷ்ரவன் குமார் ஜடாவத், எட்டிமடை சண்முகம் எம்.எல்.ஏ. ஆகியோர் முன்னிலை வகித்தனர்.

இதில் தமிழக நகராட்சி நிர்வாகம், ஊரக வளர்ச்சி மற்றும் சிறப்பு திட்டங்கள் செயலாக்கத்துறை அமைச்சர் எஸ்.பி.வேலுமணி கலந்து கொண்டு பூமி பூஜை செய்து பணிகளை தொடங்கி வைத்தார்.

அப்போது அவர் பேசும்போது கூறியதாவது:-

நவீன முறை

கோவை மாநகராட்சியின் 100 வார்டுகளில் நாளொன்றுக்கு சேகரமாகும் 1,000 முதல் 1,200 டன் அளவிலான குப்பைகள் வெள்ளலூர் பகுதியில் உள்ள குப்பை கிடங்கில் கொட்டப்பட்டு வருகிறது. இப்பகுதியில் கடந்த 2013-ம் ஆண்டு முதல் சுமார் 60 ஏக்கர் நிலப்பரப்பில் கொட்டப்பட்டுள்ள 9.5 லட்சம் கன மீட்டர் அளவிலான தரம் பிரிக்கப்படாத பழைய குப்பைகளால் அப்பகுதியில் நிலத்தடி நீர் மாசு, காற்று மாசு மற்றும் தீ விபத்துக்கள் ஏற்பட்டு வருகின்றன.

இதனை கருத்தில் கொண்டு அவ்விடத்தில் திறந்தவெளியில் கொட்டப்பட்டுள்ள பழைய குப்பைகளை தரம் பிரித்து கழிவு செய்ய அறிவியல் சார்ந்த நவீன முறையில் சுற்றுச்சூழல் மாசு படாத வண்ணம் கையாண்டு கழிவு செய்து சுமார் 61 ஏக்கர் அளவிலான நிலத்தினை மீட்டெடுக்க உத்தேசிக்கப்பட்டது.

அதன்படி ஸ்மார்ட் சிட்டி திட்டத்தின் கீழ் ரூ.60.11 கோடியில் பயோ மைனிங் என்ற நவீன முறையில் கழிவு செய்யும் திட்டத்திற்கு தமிழக அரசின் நிர்வாக அனுமதி பெறப்பட்டுள்ளது. இத்திட்டத்தைச் செயல்படுத்துவதன் மூலம் அந்த பகுதியில் ஏற்பட்டுள்ள சுற்றுச்சூழல் மாசு பிரச்சினைகளுக்கு நிரந்தர தீர்வு கிடைக்கும்.

இவ்வாறு அவர் கூறினார்.

மின்விளக்குகள்

பின்னர் தெற்கு மண்டலம் பொள்ளாச்சி மெயின் ரோடு ஆத்துப்பாலம் முதல் ஆனந்தாஸ் ஓட்டல் வரை ரூ.49 லட்சம் மற்றும் ஆனந்தாஸ் ஓட்டல் முதல் ஈச்சனாரி வரை ரூ.89.50 லட்சம் மதிப்பில் தடுப்புச்சுவருடன் கூடிய மின் விளக்குகள் அமைக்கும் பணிக்கு பூமி பூஜையையும் அமைச்சர் எஸ்.பி.வேலுமணி தொடங்கி வைத்தார்.

இந்த நிகழ்ச்சியில் மாநகராட்சி மாநகர பொறியாளர் லட்சுமணன், தெற்கு மண்டல உதவி ஆணையர் ரவி, செயற்பொறியாளர் சரவண குமார் உள்பட பலர் கலந்து கொண்டனர்.