தனித்தனி சம்பவத்தில் மோட்டார் சைக்கிள் மோதி 2 பெண்கள் சாவு

புதுப்பேட்டை,

புதுப்பேட்டை அருகே உள்ள பொன்னங்குப்பம் கிராமத்தை சேர்ந்தவர் குணசேகரன். இவருடைய மனைவி விஜயலட்சுமி (வயது 35). இவர் நேற்று முன்தினம் மாலை பொன்னங்குப்பம் மெயின் ரோட்டில் நடந்து சென்றுகொண்டிருந்தார். அப்போது பின்னால் வேகமாக வந்த மோட்டார் சைக்கிள் ஒன்று விஜயலட்சுமி மீது மோதியது. இதில் தலையில் பலத்த காயம் அடைந்த அவரை அக்கம் பக்கத்தினர் மீட்டு சிகிச்சைக்காக பண்ருட்டி அரசு மருத்துவமனையில் சேர்த்தனர்.

பின்னர் அவர் மேல்சிகிச்சைக்காக கடலூர் அரசு மருத்துவமனைக்கு கொண்டு செல்லப்பட்டார். ஆனால் மருத்துவமனைக்கு செல்லும் வழியிலேயே அவர் பரிதாபமாக இறந்தார். இதுகுறித்து குணசேகரன் புதுப்பேட்டை போலீசில் புகார் கொடுத்தார். அதன் பேரில் இன்ஸ்பெக்டர் ரேவதி வழக்குப்பதிவு செய்து விசாரணை நடத்தி வருகிறார்.

மற்றொரு சம்பவம்

பண்ருட்டி அருகே உள்ள வீரசிங்கன்குப்பம் வடக்கு தெருவை சேர்ந்தவர் சின்னத்தம்பி. இவரது மனைவி காசியம்மாள்(58). இவர் நேற்று முன்தினம் பேர்பெரியான்குப்பம் ஊராட்சி மன்ற அலுவலகம் அருகில் நடந்து சென்று கொண்டிருந்தார். அப்போது அவ்வழியாக வேகமாக வந்த மோட்டார் சைக்கிள் ஒன்று அவர் மீது மோதியது. இதில் படுகாயமடைந்த காசியம்மாளை அக்கம் பக்கத்தினர் மீட்டு சிகிச்சைக்காக பண்ருட்டி அரசு மருத்துவமனைக்கு கொண்டு சென்றனர்.

ஆனால் மருத்துவமனைக்கு செல்லும் வழியிலேயே காசியம்மாள் பரிதாபமாக உயிரிழந்தார். இதுகுறித்து முத்தாண்டிக்குப்பம் போலீஸ் இன்ஸ்பெக்டர் மலர்விழி, சப்-இன்ஸ்பெக்டர் மாயகிருஷ்ணன் ஆகியோர் விபத்தை ஏற்படுத்திய அண்ணங்காரன் குப்பத்தை சேர்ந்த தர்மலிங்கம் மீது வழக்குப்பதிவு செய்து விசாரணை நடத்தி வருகின்றனர்.