தஞ்சை மாவட்டத்தில் முழு ஊரடங்கு; 40 ஆயிரம் கடைகள் அடைப்பு

தஞ்சாவூர்,

நாடு முழுவதும் கொரோனா வைரஸ் பரவுதலின் தாக்கம் நாளுக்கு நாள் அதிகரித்த வண்ணம் உள்ளது. இந்தியாவிலும் கொரோனாவின் தாக்கம் நாளுக்கு நாள் அதிகரித்து வருகிறது. தமிழகத்தில் ஊரடங்கு வருகிற 31-ந்தேதி வரை நீட்டிக்கப்பட்டுள்ளது. கொரோனா பரவிய காலத்தில் முழு ஊரடங்கு அமல்படுத்தப்பட்டது. பின்னர் நாளடைவில் தளர்வுகள் அறிவிக்கப்பட்டன.

இந்த நிலையில் தமிழகத்தில் தினமும் ஏராளமானோர் கொரோனா தொற்றால் பாதிக்கப்பட்டு வருகிறார்கள். தமிழகத்தில் குறிப்பாக சென்னை, மதுரை, செங்கல்பட்டு, காஞ்சீபுரம், திருவள்ளூர் மாவட்டங்களிலும் கொரோனா பரவுவது அதிகரித்து வருவதை தொடர்ந்து அங்கு ஊரடங்கு அமல்படுத்தப்பட்டுள்ளது.

இதர மாவட்டங்களில் ஜூலை மாதம் முழுவதும் அனைத்து ஞாயிற்றுக்கிழமைகளிலும் தளர்வு இல்லாத முழு ஊரடங்கு அமல்படுத்தப்படும் என தமிழக அரசு அறிவித்தது. அதன்படி இந்த மாதத்தில் 2-வது ஞாயிற்றுக்கிழமையான நேற்று தஞ்சை மாவட்டத்தில் முழு ஊரடங்கு அமல்படுத்தப்பட்டது. இதனால் தஞ்சை மாவட்டத்தில் மருந்துக்கடைகள் தவிர மற்ற அனைத்து கடைகளும் அடைக்கப்பட்டன. மாவட்டத்தில் மட்டும் 40 ஆயிரம் கடைகள் அடைக்கப்பட்டுள்ளன.

இந்த முழு ஊரடங்கால் சாலைகளில் மக்கள் நடமாட்டமே காணப்படவில்லை. வாகனங்களும் இயக்கப்படாததால் தஞ்சை மாவட்டம் முழுவதும் வெறிச்சோடி காணப்பட்டது. மருத்துவமனைக்கு செல்வதற்காக வந்தவர்களை மட்டும் போலீசார் அனுமதித்தனர்.

ஆங்காங்கே பாதுகாப்பு பணிக்காக போலீசார் குவிக்கப்பட்டனர். மேலும் போலீசார் ரோந்து வந்து கண்காணிப்பில் ஈடுபட்டனர். அத்தியாவசிய தேவை இன்றி வெளியே வாகனங்களில் வந்தவர்கள் மீது வழக்கு பதிவு செய்யப்பட்டது. அவர்களிடம் அபராதமும் வசூலிக்கப்பட்டது.

நேற்றைய முழு ஊரடங்கு உத்தரவினால் மக்கள் பெரும்பாலும் வீடுகளை விட்டு வெளியே வரவில்லை. இதனால் அவர்களின் இயல்பு வாழ்க்கை அடியோடு ஸ்தம்பித்தது. மருந்துக்கடைகள், ஆம்புலன்ஸ், போலீஸ் வாகனங்கள் மட்டும் இயங்கின.

வழக்கமாக அத்தியாவசிய பொருட்களை ஏற்றிச்செல்லும் லாரிகள் கூட நேற்று முழு ஊரடங்கு காரணமாக ஆங்காங்கே நிறுத்தி வைக்கப்பட்டன. பெட்ரோல் பங்க்குகளும் நேற்று மூடப்பட்டன. மக்கள் நடமாட்டம் இல்லாததால் மருந்துக்கடைகளும் வெறிச்சோடி காணப்பட்டன.

கும்பகோணத்திலும் நேற்று முழு ஊரடங்கு கடைபிடிக்கப்பட்டது. இதன் காரணமாக கும்பகோணத்தில் போலீஸ் பாதுகாப்பு பலப்படுத்தப்பட்டது. அதன்படி கும்பகோணம் பாலக்கரை, மடத்தெரு, பெரியதெரு, பெரிகடைவீதி, தாராசுரம் மார்க்கெட் ஆகிய இடங்களில் போலீசார் கண்காணிப்பு பணி மேற்கொண்டனர். வாகனங்களில் வந்த பலர் ஆங்காங்கே நிறுத்தப்பட்டு எச்சரிக்கப்பட்டனர்.

முழு ஊரடங்கு காரணமாக கும்பகோணத்தில் ஓட்டல்கள், ஜவுளிக்கடைகள், நகைக்கடைகள் உள்பட 3 ஆயிரம் கடைகள் அடைக்கப்பட்டன. இதனால் கும்பகோணம் பெரியகடைவீதி, நாகேஸ்வரன் வடக்கு வீதி, புதிய பஸ் நிலையம் ஆகிய பகுதிகள் வெறிச்சோடி காணப்பட்டது. மருந்து கடைகளுக்கு முழு ஊரடங்கில் தளர்வு அளிக்கப்பட்டாலும் மக்கள் நடமாட்டம் இல்லாததன் காரணமாக பெரும்பாலான மருந்து கடைகள் அடைக்கப்பட்டிருந்தன. இதேபோல் பட்டுக்கோட்டையில் நேற்று தளர்வுகள் இல்லாத முழு ஊரடங்கு கடைபிடிக்கப்பட்டது.

அனைத்து கடைகளும் மூடப்பட்டிருந்தன. வாகன போக்குவரத்தும், மக்கள் நடமாட்டமும் இல்லாமல் சாலைகள் வெறிச்சோடி காணப்பட்டது.