சிவகங்கையில் பயங்கரம்: நகைக்காக மாமியார்-மருமகள் கொடூரக் கொலை - கைக்குழந்தை உயிர் தப்பியது; மர்ம கும்பல் வெறிச்செயல்

காளையார்கோவில்,

சிவகங்கை மாவட்டம் காளையார்கோவில் அருகே உள்ள முடுக்கூரணி கிராமத்தை சேர்ந்தவர் சந்தியாகு (வயது 65). இவர் முன்னாள் ராணுவ வீரர். அவருடைய மனைவி ராஜகுமாரி (60). இவர்களுக்கு 2 மகன்கள்.

மூத்த மகன் ஸ்டீபன் (38), 2-வது மகன் ஜேம்ஸ்ராஜ். இவர்களும் தற்போது ராணுவத்தில் பணியாற்றி வருகின்றனர்.

ஸ்டீபன் கடந்த 10 ஆண்டுகளுக்கு மேலாக ராணுவத்தில் இருக்கிறார். கடந்த ஓராண்டாக அவர் லடாக்கில் கல்வான் பள்ளத்தாக்கு பகுதியில் பணியில் ஈடுபட்டு வருகிறார். அவருடைய மனைவி சினேகா (30). இவர்களுக்கு சோயல்லா என்ற 7 மாத பெண் குழந்தை உள்ளது.

சினேகாவின் பெற்றோர் வீடு சென்னை எம்.கே.வி. நகரில் உள்ளது. கணவர் ராணுவத்தில் இருப்பதால் சினேகா குழந்தையுடன் பெற்றோர் வீட்டில் இருந்து வந்தார். சென்னையில் கொரோனா தொற்று அதிகரித்ததால் தனது தாயார் மற்றும் குழந்தையுடன், அவரது பூர்வீக ஊரான இளையான்குடி அருகே கோட்டையூர் கிராமத்துக்கு வந்து ஒரு மாதமாக அங்கு தங்கினார்.

இந்தநிலையில் சினேகா தனது மாமியாருடன் வசிக்க முடுக்கூரணி கிராமத்துக்கு கடந்த 3 நாட்களுக்கு முன்பு கைக்குழந்தையுடன் வந்தார். நேற்று முன்தினம் இரவு சினேகா, அவருடைய குழந்தை மற்றும் மாமியார் ராஜகுமாரி ஆகியோர் வீட்டில் தூங்கிக் கொண்டு இருந்தனர்.

வீட்டின் உள்ளே குழந்தையுடன் சினேகாவும், அவரது மாமியார் ராஜகுமாரி வீட்டின் முகப்பு பகுதியில் படுத்து இருந்தனர். மாமனார் சந்தியாகு, தோட்டத்துக்கு இரவு காவல் பணிக்கு சென்றிருந்தார்.

இந்தநிலையில் நேற்று அதிகாலையில் அவர்களது வீட்டுக்குள் கொள்ளையர்கள் புகுந்தனர். அந்த சத்தம் கேட்டு, வீட்டின் முகப்பு பகுதியில் படுத்திருந்த ராஜகுமாரி எழுந்தார். உடனே கொள்ளையர்கள், அவரது தலையில் இரும்பு கம்பியால் பலமாக அடித்தனர். இதில் ரத்த வெள்ளத்தில் விழுந்த ராஜகுமாரி சற்று நேரத்தில் பரிதாபமாக இறந்தார். பின்னர் கொள்ளையர்கள், வீட்டிற்குள் புகுந்து அங்கு தூங்கிக் கொண்டிருந்த சினேகாவின் தலையிலும் இரும்பு கம்பியால் பலமாக சரமாரியாக தாக்கி, அவரையும் கொலை செய்தனர். இந்த சம்பவத்தில், குழந்தை மட்டும் உயிர் தப்பியது.

பின்னர் வீட்டில் இருந்த பீரோவை உடைத்து அதில் இருந்த 40 பவுன் நகை மற்றும் ராஜகுமாரி கழுத்தில் அணிந்து இருந்த 8 பவுன் நகை, மருமகள் சினேகா அணிந்து இருந்த 7 பவுன் நகை, தூங்கிக்கொண்டிருந்த குழந்தையின் கழுத்தில் இருந்த 1½ பவுன் தங்கச்சங்கிலி மற்றும் குழந்தையின் காலில் இருந்த கொலுசு ஆகியவற்றை அந்த மர்ம கும்பல் கொள்ளையடித்துவிட்டு தப்பிச் சென்றுள்ளது.

இந்த நிலையில் அதிகாலை 5 மணி அளவில் குழந்தை தொடர்ந்து அழுதுகொண்டே இருந்தது. இந்த சத்தத்தை கேட்ட அக்கம் பக்கத்தினர் அங்கு வந்து பார்த்தபோது அங்கு மாமியார் ராஜகுமாரி மற்றும் மருமகள் சினேகா ஆகியோர் கொடூரமாக கொலை செய்யப்பட்டு கிடந்ததை கண்டு அதிர்ச்சி அடைந்தனர்.

உடனடியாக இந்த சம்பவம் குறித்து காளையார்கோவில் போலீசுக்கு தகவல் அளிக்கப்பட்டது. இன்ஸ்பெக்டர் இளவரசு தலைமையிலான போலீசார் சம்பவ இடத்திற்கு விரைந்து வந்து விசாரித்தனர்.

போலீஸ் டி.ஜ.ஜி. மயில்வாகனன், சிவகங்கை மாவட்ட போலீஸ் சூப்பிரண்டு(பொறுப்பு) வருண்குமார் உள்ளிட்ட போலீஸ் அதிகாரிகளும் சம்பவ இடத்தை பார்வையிட்டு விசாரணை நடத்தினர். மேலும் இந்த கொலை, கொள்ளை சம்பவத்தில் ஈடுபட்ட கொள்ளையர்களை பிடிக்க போலீஸ் தனிப்படைகள் அமைக்கப்பட்டு தீவிர தேடுதல் வேட்டை நடந்து வருகிறது. சம்பவம் தொடர்பாக காளையார்கோவில் போலீசார் வழக்குப்பதிவு செய்துள்ளனர்.

கொலையான 2 பேரின் உடல்களும் பிரேத பரிசோதனைக்காக சிவகங்கை அரசு மருத்துவக்கல்லூரி மருத்துவமனைக்கு கொண்டு செல்லப்பட்டன. அதிகாலை நேரத்தில் மாமியார், மருமகள் கொலை செய்யப்பட்டு நகைகள் கொள்ளையடிக்கப்பட்ட சம்பவம் அந்த பகுதியில் பெரும் பரபரப்பை ஏற்படுத்தி உள்ளது.