பரமக்குடியில் பரபரப்பு: போலீஸ் நிலையத்துக்கு புகார் அளிக்க சென்ற வாலிபர் திடீர் சாவு - சூப்பிரண்டு நேரில் விசாரணை

பரமக்குடி,

ராமநாதபுரம் மாவட்டம் பரமக்குடி படேல் தெருவை சேர்ந்தவர் துரைராஜ் (வயது 59). இவருக்கும் இவரின் வீட்டின் அருகே குடியிருக்கும் பால்கரசு என்பவருக்கும் இடப்பிரச்சினை இருந்துள்ளது. இது குறித்து கோர்ட்டில் வழக்கு நடைபெற்ற நிலையில், மூன்று மாதத்திற்கு முன்பு துரைராஜூவுக்கு சாதகமாக தீர்ப்பு வந்ததாக கூறப்படுகிறது.

அந்த தீர்ப்பின் அடிப்படையில், சம்பந்தப்பட்ட இடத்தை சுத்தம் செய்யும் பணியில் துரைராஜ் மற்றும் அவரது மகன் கூடலிங்கம்(29) ஈடுபட்டனர். இதனால், ஆத்திரமடைந்த பால்கரசு, துரைராஜூவுடன் தகராறில் ஈடுபட்டதாகவும், பால்கரசின் உறவினர்கள் சிலர் ஆயுதங்களால் துரைராஜை தாக்கியதாகவும் கூறப்படுகிறது. அப்போது அங்கிருந்த துரைராஜின் மகன் கூடலிங்கம், தடுக்க சென்றபோது, அவர்கள் கூடலிங்கத்தை தாக்கியதாகவும் தெரியவருகிறது.

இதில் காயமடைந்த கூடலிங்கம் பரமக்குடி நகர் போலீஸ் நிலையத்தில் புகார் அளிக்கச் சென்றார். அப்போது திடீரென மயக்கமடைந்து கீழே விழுந்ததாகவும், உடனே போலீசார் கூடலிங்கத்தை பரமக்குடி அரசு மருத்துவமனைக்கு சிகிச்சைக்கு கொண்டு சென்றதாகவும், அவரை டாக்டர் பரிசோதித்த போது ஏற்கனவே இறந்துவிட்டதாகவும் தெரியவந்தது. இதனால், கூடலிங்கத்தின் உறவினர்கள் அரசு மருத்துவமனை முன்பு கூடி அவரை தாக்கியவர்கள் மீது வழக்குப்பதிவு செய்ய நடவடிக்கை எடுக்க வேண்டும் எனக் கோரிக்கை விடுத்தனர்.

இதனைத்தொடர்ந்து கூடலிங்கத்தின் தந்தை துரைராஜ் கொடுத்த புகாரின் அடிப்படையில், பரமக்குடி நகர் காவல் நிலையத்தில் வழக்கு பதிவு செய்து விசாரணை செய்து வருகின்றனர். புகார் அளிக்க போலீஸ் நிலையத்துக்கு சென்றவர் திடீரென உயிரிழந்த சம்பவம், பரமக்குடி பகுதியில் பரபரப்பை ஏற்படுத்தியது.

இதையடுத்து அந்த பகுதியில் துணை போலீஸ் சூப்பிரண்டு வேல்முருகன் தலைமையிலான போலீசார் பாதுகாப்பு பணியில் ஈடுபட்டு வருகின்றனர். இதுபற்றி அறிந்த ராமநாதபுரம் மாவட்ட போலீஸ் சூப்பிரண்டு வருண்குமார் விரைந்து வந்து விசாரணை மேற்கொண்டார்.