குடிநீர் கேட்டு ஊராட்சி ஒன்றிய அலுவலகத்தை காலி குடங்களுடன் பெண்கள் முற்றுகை - விழுப்புரம் அருகே பரபரப்பு

விழுப்புரம்,

விழுப்புரம் அருகே கோலியனூர் ஊராட்சி ஒன்றியத்துக்குட்பட்ட சின்ன குச்சிப்பாளையம் கிராமத்தில் 300-க்கும் மேற்பட்ட குடும்பத்தினர் வசித்து வருகின்றனர். இவர்களுக்கு ஊராட்சி ஒன்றிய அலுவலகம் சார்பில் தினந்தோறும் வினியோகம் செய்யப்பட்டு வந்த குடிநீர் ஆழ்துளை கிணறு நீர்மட்டம் வறண்டதால் கடந்த சில மாதங்களாக வழங்கப்படவில்லை. இதனால் அங்கு குடிநீர் தட்டுப்பாடு ஏற்பட்டது. இதனால் பாதிக்கப்பட்ட பொதுமக்கள் தங்களது கிராமத்துக்கு குடிநீர் வசதி ஏற்படுத்தி, தடையின்றி தங்களுக்கு குடிநீர் வினியோகம் செய்ய வேண்டும் என்று கோலியனூர் ஊராட்சி ஒன்றியத்தில் பலமுறை கோரிக்கை வைத்தனர். இருப்பினும் எந்த நடவடிக்கையும் எடுக்கப்படவில்லை.

இதனால் ஆத்திரமடைந்த சின்ன குச்சிபாளையத்தை சேர்ந்த பெண்கள் காலி குடங்களுடன் நேற்று காலை கோலியனூர் ஊராட்சி ஒன்றிய அலுவலகத்துக்கு திரண்டு வந்தனர். பின்னர் அவர்கள் தங்களது கிராமத்துக்கு உடனடியாக குடிநீர் வசதி செய்து தரவேண்டும் என்று கண்டன கோஷம் எழுப்பியபடி ஊராட்சி ஒன்றிய அலுவலகத்தை முற்றுகையிட்டு போராட்டத்தில் ஈடுபட்டனர். இதுபற்றி தகவல் அறிந்ததும் வளவனூர் போலீசார் மற்றும் தாசில்தார் முருகன் ஆகியோர் சம்பவ இடத்துக்கு விரைந்து வந்து, போராட்டத்தில் ஈடுபட்ட பெண்களிடம் பேச்சுவார்த்தை நடத்தி, சம்பந்தப்பட்ட துறை அதிகாரிகளிடம் பேசி ஓரிரு வாரங்களில் குடிநீர் வசதி செய்யப்படும் என்று உறுதியளித்தனர். இதனை ஏற்ற பெண்கள் போராட்டத்தை கைவிட்டு, அங்கிருந்து கலைந்து சென்றனர். இந்த சம்பவத்தால் அப்பகுதியில் சிறிது நேரம் பரபரப்பு ஏற்பட்டது.