அதிக வட்டி தருவதாக கூறி 11 பேரிடம் ரூ.65 லட்சம் மோசடி - தந்தை-மகன் கைது

கரூர்,

கரூர் மாவட்டம் லாலாபேட்டையில் ஸ்ரீலோகா குரு நிதி நிறுவனம் உள்ளது. இந்த நிறுவனத்தில் முதலீடு செய்தால் அதிக வட்டி தருவதாகவும், தேவைப்படும் போது அசல் தொகை உடனடியாக வழங்கப்படும் என்றும் கூறியுள்னர். இதை நம்பி கரூர், திருச்சி மாவட்டங்களை சேர்ந்த பலர் இந்த நிதி நிறுவனத்தில் அதிக அளவில் பணம் செலுத்தியுள்ளனர்.

திருச்சி மாவட்டம் தாராநல்லூரை சேர்ந்த பொன்னையா பிள்ளை (வயது 83) என்பவர் ரூ.5 லட்சத்தை டெபாசிட் செய்திருந்தார். இந்நிலையில் அதற்கான வட்டி மற்றும் அசல் தொகையை பெறுவதற்காக லாலாபேட்டைக்கு வந்துள்ளார். ஆனால் அந்த நிதி நிறுவனம் மூடப்பட்டு இருந்தது.

இதனால் அதிர்ச்சி அடைந்த அவர் நிதி நிறுவனம் நடத்தி வரும் பங்குதாரர்களிடம், கேட்ட போது அவர்கள் பணத்தை திரும்ப கொடுக்கவில்லை. இதை தொடர்ந்து பொன்னையா பிள்ளை கரூர் பொருளாதார குற்ற பிரிவு போலீசில் புகார் அளித்தார். அதன் பேரில் பொருளாதார குற்றப்பிரிவு போலீசார் விசாரணை நடத்தினர். விசாரணையில் 11 பேர்களிடம் இருந்து ரூ.65 லட்சம் வரை இந்த நிதி நிறுவன பங்குதாரர்கள் மோசடி செய்தது தெரியவந்தது. இதைத்தொடர்ந்து அவர்கள் மீது 4 பிரிவுகளின் கீழ் வழக்கு பதிவு செய்து நிதி நிறுவன பங்குதாரர்கள் சேதுராமன் (59), அவரது மகன் ஹரிஹரசுதன் (35) ஆகியோரை கைது செய்தனர். மேலும் கிருஷ்ணமூர்த்தி என்பவரை வலைவீசி தேடி வருகின்றனர்.