மயிலாடுதுறை-தஞ்சை இடையே 68 கி.மீ. தூரத்திற்கு மின்சார ரெயில் பாதை அமைக்கும் பணிகள் அக்டோபருக்குள் முடிக்க திட்டம்

தஞ்சாவூர், 

திருச்சி ரெயில்வே கோட்டத்தில் 2 முக்கிய வழித்தடங்கள் உள்ளன. ஒன்று திருச்சி-விழுப்புரம் இடையேயான விருத்தாசலம், அரியலூரை உள்ளடக்கிய ரெயில்பாதை. இது ‘கார்டு லைன்’ என்று அழைக்கப்படுகிறது. மற்றொன்று தஞ்சை, கும்பகோணம், மயிலாடுதுறை, சீர்காழி, சிதம்பரம், கடலூர் வழியான ரெயில் பாதை. இது ‘மெயின் லைன்’ என்று அழைக்கப்படுகிறது. இதில் தஞ்சை வழியான ரெயில்பாதையே மிகவும் பழமை வாய்ந்த ரெயில் பாதை ஆகும். இது ஆங்கிலேயேர் காலத்திலேயே அமைக்கப்பட்டது.

இதில் திருச்சி-விழுப்புரம் இடையேயான இரட்டை ரெயில் பாதையில் மின்சார ரெயில் பாதை பணிகள் முடிவடைந்து ரெயில்கள் இயக்கப்பட்டு வருகின்றன. தஞ்சை வழியிலான ரெயில் பாதையில் மின்மயமாக்கும் பணிகள் நடந்து வருகிறது.

தஞ்சையில் இருந்து கும்பகோணம், மயிலாடுதுறை, கடலூர், விழுப்புரம் வரையிலான மின்சார ரெயில் பாதை அமைக்கும் பணிகள் தொடங்கி நடந்து வருகிறது. கடலூர்-விழுப்புரம் இடையே பணிகள் முடிவடைந்து விட்டது. தஞ்சையில் இருந்து கடலூர் வரையிலான பணிகள் நடந்து வருகிறது. இந்த பணிகளை ரெயில்வே துறையில் உள்ள ரெயில் விகாஸ் நிகாம் லிமிடெட் நிறுவனம் மேற்கொண்டு வருகிறது.

ஒற்றை ரெயில் பாதையான இந்த வழித்தடத்தில் ரூ.300 கோடியில் 228 கி.மீ. தூரம் இந்த பணிகள் மேற்கொள்ளப்பட்டன. முதல் கட்டமாக விழுப்புரம்-கடலூர் இடையே 29 கி.மீ. தூரம் பணிகள் மேற்கொள்ளப்பட்டன. இந்த பணிகள் 2019-ம் ஆண்டு பிப்ரவரி மாதத்தில் முடிக்கப்பட்டன. 2-வது கட்டமாக கடலூரில் இருந்து மயிலாடுதுறை வரை 110 கி.மீ. தூரம் பணிகள் மேற்கொள்ளப்பட்டன. இந்த பணிகள் கடந்த மார்ச் மாதத்தில் முடிக்கப்பட்டன.

இறுதி கட்டமாக மயிலாடுதுறையில் இருந்து தஞ்சை வரையிலான 68 கி.மீ. தூரத்திற்கு மின்மயமாக்கும் பணிகள் தொடங்கப்பட்டன. பணிகள் தொடங்கி தீவிரமாக நடந்து வந்த நேரத்தில் கொரோனா ஊரடங்கு காரணமாக பணிகளில் தாமதம் ஏற்பட்டது. இந்த பணிகளில் ஈடுபட்ட வடமாநில தொழிலாளர்கள் தங்களது சொந்த ஊருக்கு திரும்பியதால் பணிகள் தாமதம் ஆனது.

இந்த நிலையில் ஊரடங்கில் தளர்வுகள் அறிவிக்கப்பட்டதையடுத்து ஜூன் மாத இறுதியில் வடமாநில் தொழிலாளர்கள் மீண்டும் பணிக்கு திரும்பினர். அதுவரையில் சிறு, சிறு பணிகள் நடைபெற்றன. அதன் பின்னர் பணிகள் தொடங்கி தற்போது தீவிரமாக நடந்து வருகிறது.

தற்போது வடமாநிலத்தை சேர்ந்த 100-க்கும் மேற்பட்ட தொழிலாளர்கள் இந்த பணியில் ஈடுபட்டுள்ளனர். இந்த பணிகளை அக்டோபர் மாதத்துக்குள் முடிக்க திட்டமிட்டு அதன்படி பணிகள் தீவிரமாக நடந்து வருகிறது.

இந்த வழித்தடத்தில் ஏற்கனவே விழுப்புரத்தில் இருந்து கடலூர் வரையிலும், கடலூரில் இருந்து மயிலாடுதுறை வரையிலும் மின்மயமாக்கல் பணியை பெங்களூரில் உள்ள ரெயில்வே பாதுகாப்பு ஆணையர் ஆய்வு செய்து அனுமதியும் அளித்து விட்டார்.

இது குறித்து ரெயில்வே அதிகாரிகள் கூறுகையில், “மெயின் லைனில் மின்மயமாக்கும் பணிகள் தற்போது தஞ்சை-மயிலாடுதுறை இடையே தீவிரமாக நடந்து வருகிறது. இந்த பணிகள் அக்டோபருக்குள் முடிவடைந்து ஆவணங்கள் ரெயில்வே பாதுகாப்பு ஆணையரிடம் சமர்ப்பிக்கப்படும். அதன் பின்னர் அவர் ஆய்வு செய்து மின்சார ரெயில் என்ஜின் இயக்க அனுமதி அளிப்பார். இந்த பணிக்காக கடலூர் மற்றும் மயிலாடுதுறையில் துணை மின் நிலையமும் கட்டப்பட்டு வருகிறது.

இதில் கடலூர் துணை மின் நிலையத்திற்கு தமிழ்நாடு மின்சார வாரியமும் மின் இணைப்பு வழங்கி விட்டது. மயிலாடுதுறை துணை மின் நிலையத்திற்கு பணம் கட்டப்பட்டு விட்டது. இதற்கு மின் இணைப்பு அடுத்த ஆண்டு தான் கிடைக்கும் என எதிர்பார்க்கப்படுகிறது. அடுத்த ஆண்டு மின் இணைப்பு கிடைத்தாலும் மின்சார ரெயில் இயக்குவதில் எந்தவித சிரமம் இருக்காது. காரணம், கடலூர் மற்றும் தஞ்சையில் உள்ள துணை மின் நிலையங்களில் இருந்து மின்சாரம் எடுத்து ரெயில் இயக்கப்படும்”என்றார்.

இந்த வழித்தடம் டெல்டா பகுதியை உள்ளடக்கியது. ஏற்கனவே இந்த வழித்தடத்தில் சரக்கு ரெயில்களில் ரெயில் இயக்கம் அதிக அளவில் நடந்து வருகிறது. மின்சார ரெயில் சேவை பயன்பாட்டிற்கு வந்தால் பயணிகள் ரெயில், மற்றும் சரக்கு ரெயில் மின்சார என்ஜின் மூலம் இயக்கப்படும். மின்சார ரெயில் இயக்குவதன் மூலம் மாசு குறைவதுடன், இழுவைத்திறனும் அதிகரிக்கும் என்பது குறிப்பிடத்தக்கது.