மதுரை அருகே, கிராம காவல்பணியை குறிக்கும் அரியவகை கல்வெட்டு கண்டெடுப்பு

பேரையூர்,

மதுரை அருகே உள்ள கூடல் செங்குளத்தை சேர்ந்த முதுகலை வரலாற்றுத்துறை மாணவர் ரஞ்சித்குமார் கண்மாயில் ஒரு கல்வெட்டு இருப்பதாக கொடுத்த தகவலின்பேரில் மதுரை சரஸ்வதி நாராயணன் கல்லூரி வரலாற்றுத்துறை பேராசிரியர்கள் முனீஸ்வரன், லட்சுமண மூர்த்தி ஆகியோர் கல்வெட்டை படித்து ஆய்வு செய்தனர்.

இதுகுறித்து முனீஸ்வரன் கூறியதாவது, மன்னர்கள் ஆட்சிக்காலத்தில் ஊரவர், நாட்டவர், சிற்றரசர் படைப்பிரிவினர் ஆகியோர் அந்தந்த பகுதிகளில் படைகளை உருவாக்கி மக்களை பாதுகாத்து வந்துள்ளனர். மதுரையில் கி.பி. 13-14-ம் நூற்றாண்டுகளில் கிராமங்களில் இருந்த நிலச்சுவான்தார்கள் அவ்வூர் ஆட்சியாளர்களாகவும் செயல்பட்டு வந்துள்ளனர். இவர்கள் ஊர் பாதுகாப்புக்கென காவல் நியமித்து கொள்ளும் வழக்கம் இருந்துள்ளது. இவ்வாறு காவல் செய்வோர் குளம் வெட்டுதல், பாசனத்தை முறைப்படுத்தி வழங்குதல், கோவில் நிர்வாகம், பொது நிகழ்வுகளை முன்னெடுத்தல் ஆகிய உரிமைகளையும் பெற்றிருந்தனர்.

பாதுகாப்பு தந்து காவல் செய்யும் உரிமையை யார் பெற்றுள்ளார்களோ அவர்கள் அதை உறுதிப்படுத்தி அறிவிப்பதை ஆசிரியம் கொடுத்தல் என்கிறார்கள். ஆசிரியம் என்ற சொல்லுக்கு பாதுகாப்பு தருதல், அடைக்கலம் தருதல் என்று பொருள். இந்த சொல் ஆசிரயம், ஆச்சரயம் என மாறுபட்ட உச்சரிப்புகளுடன் கல்வெட்டுகளில் காணப்படுகிறது. இதுவரை தமிழகத்தில் 75-க்கும் மேற்பட்ட ஆசிரியம் கல்வெட்டுகள் கண்டெடுக்கப்பட்டுள்ளன. கிராமத்தை ஒரு குறிப்பிட்ட குழுவினர் காவல் காத்து வருவதை அனைவருக்கும் அறிவிக்கும் வகையில் கல்வெட்டை ஊரின் எல்லையிலோ, மையப்பகுதியிலோ, கோவில்களிலோ நட்டு வைப்பது வழக்கம். கூடல் செங்குளம் கண்மாயில் புதிதாக கண்டெடுக்கப்பட்டுள்ள கல்வெட்டு 3½ அடி நீளம், 1½ அடி அகலம் கொண்டதாக உள்ளது. கற்பலகையில் 5 வரிகளில் எழுத்து பொறிக்கப்பட்டுள்ளது. கல்லின் மேல் பகுதி உடைந்த நிலையில் உள்ளதால் இதன் முதல் வரி சிதைந்துள்ளது. இதில் சொல்லப்படும் கொம்பாடி எனும் ஊர் கண்மாயின் தென்பகுதியில் உள்ளது குறிப்பிடத்தக்கது.

மேலும் கொம்பாடி என்ற நகரத்துக்கு கண்டிய தேவர் என்பவர் பாதுகாவலாக இருந்ததை உறுதிப்படுத்தி ஆசிரியம் கொடுத்துள்ளதை இந்த கல்வெட்டு மூலம் அறிய முடிகிறது. இதன் கீழ்பகுதியில் முக்காலி மீது பூரண கும்பமும், இருபக்கமும் குத்து விளக்குகளும் பொறிக்கப்பட்டுள்ளன. இது மதுரை மாவட்டத்தில் முதன்முறையாக கண்டெடுக்கப்பட்ட அரியவகை கல்வெட்டு ஆகும். இதுகுறித்து மேலும் ஆராய்ந்தால் பல அரிய தகவல்கள் கிடைக்கலாம். இவ்வாறு அவர் கூறினார்.