திருப்பத்தூர் அருகே, 80 வயது மூதாட்டியிடம் தவறாக நடக்க முயன்றவர் கைது

திருப்பத்தூர், 

திருப்பத்தூ பகுதியை சேர்ந்தவர் 80 வயது மூதாட்டி. இவர் தனது கணவர் இறந்துவிட்டதால் தனியாக வசித்து வருகிறார். இந்த நிலையில் வீட்டில் தனியாக படுத்திருந்த அவரை அதே பகுதியைச் சேர்ந்த பார்த்திபன் (62) என்பவர் குடிபோதையில் கட்டிப் பிடித்து, உள்ளே வா என்று இழுத்து செல்ல முயற்சி செய்ததாக கூறப்படுகிறது. இதனால் மூதாட்டி கூச்சலிட்டார். அவரின் சத்தத்தை கேட்டு அவருடைய பேரனும், அவரது மனைவியும் ஓடிவந்து பார்த்திபனை தள்ளிவிட்டு, மூதாட்டியை மீட்டனர்.

அப்போது பார்த்திபன் குடிபோதையில் அனைவரையும் கொன்று விடுவேன் என்று மிரட்டியுள்ளார். இதுகுறித்து திருப்பத்தூர் அனைத்து மகளிர் போலீஸ் நிலையத்தில் மூதாட்டி புகார் செய்தார். அதன்பேரில் பெண்கள் வன்கொடுமை சட்டத்தின்கீழ் போலீசார் வழக்குப்பதிவு செய்து பார்த்திபனை கைது செய்தனர்.