திருவள்ளூர் மாவட்டத்தில் கொரோனா தொற்றுக்கு இதுவரை 630 பேர் பலி

திருவள்ளூர்,

திருவள்ளூர் மாவட்டத்தில் நேற்று 137 பேர் கொரோனா வைரசால் பாதிக்கப்பட்டு உள்ளனர். இதுவரையில் மாவட்டம் முழுவதும் 38 ஆயிரத்து 769 பேர் பாதிக்கப்பட்டுள்ளனர். அவர்களில் 37 ஆயிரத்து 127 பேர் மருத்துவமனையில் சிகிச்சை பெற்று வீடு திரும்பியுள்ளனர். 1,012 பேர் மருத்துவமனையில் சிகிச்சை பெற்று வருகின்றனர். மாவட்டத்தில் நேற்று தொற்றுக்கு ஒருவர் இறந்ததையடுத்து, இதுவரையில் 630 பேர் கொரோனா வைரஸ் பாதிப்பால் இறந்துள்ளனர்.

செங்கல்பட்டு மாவட்டத்தில் நேற்று ஒரே நாளில் 112 பேர் கொரோனா தொற்றால் பாதிக்கப்பட்டனர். மாவட்டம் முழுவதும் இதுவரை பாதிக்கப்பட்டோர் எண்ணிக்கை 44 ஆயிரத்து 729 ஆக உயர்ந்துள்ளது. இவர்களில் 43 ஆயிரத்து 98 பேர் சிகிச்சை பெற்று வீடு திரும்பினர். நேற்று ஒரே நாளில் மட்டும் சிகிச்சை பலனின்றி 5 பேர் உயிரிழந்தனர். இதனால் செங்கல்பட்டு மாவட்டத்தில் பலியானோரின் எண்ணிக்கை 693 ஆக உயர்ந்தது. 938 பேர் ஆஸ்பத்திரியில் சிகிச்சை பெற்று வருகின்றனர்.

காஞ்சீபுரம் மாவட்டத்தில் நேற்று 85 பேர் கொரோனா வைரசால் பாதிக்கப்பட்ட நிலையில், மாவட்டம் முழுவதும் தொற்றுக்கு 26 ஆயிரத்து 121 பேர் பாதிக்கப்பட்டுள்ளனர். இதில், 25 ஆயிரத்து 307 பேர் மருத்துவமனையில் சிகிச்சை பெற்று வீடு திரும்பியுள்ளனர். மாவட்டத்தில் நேற்று தொற்றுக்கு 2 பேர் இறந்ததையடுத்து, இதுவரையில் 403 பேர் கொரோனா வைரஸ் பாதிப்பால் இறந்துள்ளனர். 411 பேர் மருத்துவமனையில் தொடர்ந்து சிகிச்சை பெற்று வருகின்றனர்.