தஞ்சை மாவட்டத்தில் தொடர் மழையால் வயல்வெளிகளில் தண்ணீர் நிரம்பியதால் அதிக அளவில் காணப்பட்ட நத்தைகள்

தஞ்சாவூர்,

நத்தைகளில் நிலநத்தை, கடல் நத்தை என 2 வகை உண்டு. இதில் நில நத்தை என்பது மழை காலங்களில் காடு, ஏரி, குளம் போன்ற தண்ணீர் தேங்கி உள்ள பகுதிகளில் காணப்படும். இந்த வகை நத்தை விஷத்தன்மை அற்றது. ஆனால் கடல் நத்தைகளில் விஷம் உண்டு என்பார்கள். தஞ்சை மாவட்டத்தில் பெரும்பாலும் நத்தை சாப்பிடும் பழக்கம் அதிக அளவில் உள்ளது.

வயல் மற்றும் நீர்நிலைகளில் கிடைக்கும் நத்தைகளை உயிரோடு பிடித்து வந்து கொதிக்க வைத்த நீரில் சற்று நேரம் போட்டால் நத்தை இறந்து விடும். பிறகு அதன் ஓடுகளை உடைத்து நத்தைகளை தனியாக பிரித்து பின்னர் அதனை வேகவைத்து சாப்பிடுவார்கள். இன்று சில பகுதிகளில் நத்தை கறி ஸ்பெஷல் என ஓட்டல்களில் போட்டு விற்பனை செய்வதை கூட நாம் பார்த்து இருக்கிறோம்.

தொடர்மழை

தஞ்சை மாவட்டம் விவசாயம் நிறைந்த பகுதியாகும். இந்த பகுதியில் ஏரி, குளம், குட்டைகள், பாசன வாய்க்கால்கள் போன்ற நீர்நிலைகள் அதிகமாக உள்ளன. இதில் நெல் வயல்கள் மற்றும் நீர் நிலைகளில் நத்தைகள் அதிக அளவில் காணப்படும். அந்த நத்தைகளை உணவுக்காக பிடிப்பதோடு மட்டும் இல்லாமல் விற்பதும் உண்டு.

தஞ்சை மீன்மார்க்கெட் பகுதிகளில் நத்தைகள் விற்பனை நடப்பது உண்டு. நத்தை மருத்துவ குணம் கொண்டது என்பதால் இதனை அதிக அளவில் வாங்கி செல்கிறார்கள். தஞ்சை மாவட்டத்தில் தற்போது பெய்த தொடர்மழை காரணமாக எங்கு பார்த்தாலும் வெள்ளக்காடாக காட்சி அளிக்கிறது. வயல்வெளி பகுதிகளிலும் தண்ணீர் நிரம்பி காணப்படுகிறது. இதனால் வயல்பகுதிகளிலும், குளம் உள்ளிட்ட நீர்நிலை பகுதிகளிலும் நத்தை அதிக அளவில் காணப்படுகின்றன.

வாலிபர்கள் பிடித்தனர்

தஞ்சையை அடுத்த சூரக்கோட்டை, மன்னார்குடி சாலையில் உள்ள காட்டூர், வரவுக்கோட்டை, தஞ்சை மாரியம்மன்கோவில், அருள்மொழிப்பேட்டை, உள்ளிட்ட பகுதிகளில் நீர்நிலைகள் அதிகம் உள்ளன. இந்த பகுதிகளில் நத்தைகளும் அதிகமாக காணப்படுகின்றன. இந்த நத்தைகளை அந்த பகுதியை சேர்ந்த இளைஞர்கள் உணவுக்காக பிடித்துச்செல்ல அதிக ஆர்வம் காட்டி வருகிறார்கள். சிலர் நத்தைகளை பிடித்து சாலை ஓரத்திலேயே விற்பனை செய்து வருகிறார்கள்.