ஆளும் கூட்டணி கட்சிகள் ஆதரவு விவசாயிகள் சார்பில் இன்று ‘பாரத் பந்த்’ மராட்டியத்தில் பலத்த போலீஸ் பாதுகாப்பு

மும்பை, 

3 வேளாண் சட்டங்களை கடும் அமளிக்கு மத்தியில் நாடாளுமன்ற இரு அவைகளிலும் மத்திய அரசு நிறைவேற்றியது.

இந்த 3 வேளாண் சட்டங்கள் மற்றும் மின்சார திருத்த சட்டத்தை எதிர்த்தும், அச்சட்டங்களை திரும்ப பெற வலியுறுத்தியும் தலைநகர் டெல்லியில் கடந்த 10 நாட்களுக்கும் மேலாக பஞ்சாப், அரியானா மாநிலங்களை சேர்ந்த விவசாயிகள் பெருமளவில் திரண்டு போராட்டம் நடத்தி வருகின்றனர்.

விவசாயிகளுடன் மத்திய அரசு அடுத்தடுத்து நடத்திய பேச்சுவார்த்தைகளும் தோல்வியிலேயே முடிந்திருக்கின்றன. 3 வேளாண் சட்டங்களும் ரத்து செய்ய வேண்டும் என்பதில் விவசாயிகள் அனைவரும் தீவிரமாக போராட்டத்தை முன்னெடுத்து வருகிறார்கள்.

வேளாண் சட்டங்களை நீக்க வாய்ப்பில்லை என்றும், அதில் திருத்தங்கள் வேண்டுமானால் செய்ய தயாராக இருப்பதாகவும் மத்திய அரசு தொடர்ந்து கூறி வருகிறது. இதனால் இதுவரை நடந்த 5 சுற்று பேச்சுவார்த்தைகளிலும் சுமுக உடன்பாடு எட்டப்படவில்லை. 6-ம் கட்ட பேச்சுவார்த்தை நாளை (புதன்கிழமை) நடைபெற இருக்கிறது.

விவசாயிகளுக்கு ஆதரவாக நாடு முழுவதும் பல்வேறு அரசியல் கட்சிகள், அமைப்புகள் பல கட்ட போராட்டங்களில் ஈடுபட்டு வருகிறார்கள்.

இதற்கிடையில் 3 வேளாண் சட்டங்களையும் ரத்து செய்ய வலியுறுத்தி நாடு முழுவதும் 8-ந் தேதி (இன்று) முழு அடைப்பு போராட்டத்தை (பாரத் பந்த்) டெல்லியில் போராடி வரும் விவசாயிகள் அறிவித்தனர். விவசாயிகளின் முழு அடைப்பு போராட்டத்துக்கு காங்கிரஸ், தேசியவாத காங்கிரஸ், திரிணாமுல் காங்கிரஸ், ராஷ்டிரீய ஜனதா தளம், சமாஜ்வாடி, சிவசேனா உள்ளிட்ட எதிர்க்கட்சிகள் ஆதரவு அளித்துள்ளன. தமிழகத்தில் தி.மு.க., மார்க்சிஸ்ட் கம்யூனிஸ்டு, இந்திய கம்யூனிஸ்டு உள்ளிட்ட எதிர்க்கட்சிகள் ஆதரவு தெரிவித்திருக்கின்றன.

விவசாயிகள் அறிவித்திருக்கும் முழு அடைப்பு போராட்டத்தை வெற்றிகரமாக நடத்திட எதிர்க்கட்சிகள் திட்டமிட்டு வருகின்றன. மராட்டியத்தில் ஆளும் கட்சிகளே ஆதரவு தெரிவித்து இருப்பதால் முழு அடைப்பின் பாதிப்பு எதிரொலிக்கும் என்று எதிர்பார்க்கப்படுகிறது. பஸ், ஆட்டோ, டாக்சிகளை இயக்குவதிலும் தடை ஏற்பட வாய்ப்பு உள்ளது. கடைகளும் அடைக்கப்பட வாய்ப்பு இருக்கிறது.

இதனால் சட்டம்-ஒழுங்கு பாதிப்பு ஏற்படுவதை தவிர்க்க மும்பை உள்பட மாநிலம் முழுவதும் பலத்த போலீஸ் பாதுகாப்பு போடப்பட்டு உள்ளது.

முழு அடைப்பு நடந்தாலும் ரெயில் போக்குவரத்தில் எந்த பிரச்சினையும் ஏற்படாது என்றே தெரிகிறது.

உள்ளாட்சி தேர்தல் என்பதால் முழு அடைப்புக்கு ஆதரவளிக்க முடியவில்லை என கேரளா மாநிலத்தில் ஆளும் அரசாக இருக்கும் கம்யூனிஸ்டு கட்சி தெரிவித்திருக்கிறது.

தமிழகத்தில் தி.மு.க. தலைமையிலான கூட்டணி கட்சிகள் முழு அடைப்பு போராட்டத்தை வலுவாக நடத்திட முயற்சியெடுத்து வருகின்றன. அதேவேளை முழு அடைப்பு காரணமாக மக்களின் இயல்பு வாழ்க்கை பாதிக்கப்பட்டு விடக்கூடாது என்பதில் தமிழக அரசும் தீவிரமாக ஈடுபட்டு வருகிறது. எந்த வகையிலும் முழு அடைப்பையொட்டி, பஸ் மற்றும் ரெயில் போக்குவரத்து பாதித்து விடக்கூடாது என்பதில் அரசு தீவிரம் காட்டி வருகிறது.

இந்த நிலையில் போராட்டத்தை திறமையாக எதிர்கொள்வது தொடர்பாக அனைத்து மாநிலங்கள் மற்றும் யூனியன் பிரதேசங்களுக்கு மத்திய உள்துறை அமைச்சகத்தில் இருந்து அறிவுறுத்தல் அனுப்பப்பட்டு உள்ளது. அதில் முக்கியமாக 3 விஷயங்கள் குறிப்பிடப்பட்டு உள்ளன.

முதலாவதாக, கொரோனா நோய்த்தொற்றை முன்னிட்டு போராட்டக்காரர்கள் போதுமான சமூக விலகலையும், சுகாதார நடைமுறைகளையும் பின்பற்றுகிறார்களா? என்பதை அனைத்து மாநிலங்களும் உறுதி செய்ய வேண்டும்

இரண்டாவதாக, நாட்டில் எந்த விதமான அசம்பாவித சம்பவங்களும் ஏற்படாமல் இருக்க பாதுகாப்பை கடுமையாக்க வேண்டும் என்றும், இது தொடர்பான அனைத்து முன்எச்சரிக்கை நடவடிக்கைகளையும் மாநிலங்கள் மேற்கொள்ள வேண்டும் என்றும் கேட்கப்பட்டு இருக்கிறது.

மூன்றாவதாக, பாதுகாப்பு கடுமையாக்கப்படும் வேளையில் அமைதியை பராமரிப்பதிலும் கவனமாக செயல்பட வேண்டும் என்று கூறப்பட்டு உள்ளது.