காங்கேயம் இன மாடுகள் ரூ.17 லட்சத்திற்கு விற்பனை

முத்தூர்,

திருப்பூர் மாவட்டம் நத்தக்காடையூர் அருகே உள்ள பழையகோட்டை மாட்டுத்தாவணியில் கொரோனா ஊரடங்கு அமலில் உள்ள தற்போதைய சூழ்நிலையில் அரசின் உத்தரவின்படி உரிய கட்டுப்பாடுகளுடனும், பாதுகாப்புகளோடும் திறக்கப்பட்டு 13-வது வாரமாக நேற்று சந்தை நடைபெற்றது.

இந்த சந்தையில் காங்கேயம் இன பெரிய பூச்சி காளைகள், இளம் பூச்சி காளைகள், செவலை பசுமாடுகள், மயிலை பூச்சி காளைகள், மயிலை மாடுகள், மயிலை கிடாரிகள், காராம்பசு கிடாரி கன்றுகள் ஆகிய காங்கேயம் இனங்களை மட்டும் விற்பனைக்காக கொண்டு வந்திருந்தனர்.

இதில் காங்கேயம் இன நாட்டு பசு மாடுகள், கன்றுகள், காளைகள் என ரகம் வாரியாக தரம் பிரிக்கப்பட்டு விற்பனை செய்யப்பட்டது.

இதன்படி இந்த சந்தையில் நேற்று விற்பனைக்காக கொண்டு வரப்பட்ட மொத்தம் 65 காங்கேயம் இன காளைகள், மாடுகளில் மொத்தம் 45 நாட்டு மாடுகள் விற்பனை செய்யப்பட்டன.

ரூ.17 லட்சத்துக்கு விற்பனை

இந்த சந்தையில் அதிகபட்சமாக 9 மாத சினையுடன் காங்கேயம் இன மயிலை பசுமாடு ரூ.69 ஆயிரத்து 500-க்கு விற்பனை செய்யப்பட்டது.

மேலும் சந்தையில் காங்கேயம் இன இளங்கன்றுகள் ஆரம்ப விலையாக ரூ.32 ஆயிரம் முதல் விற்பனை செய்யப்பட்டது.

நேற்று மட்டும் ஒரே நாளில் இந்த சந்தையில் மொத்தம் ரூ.17 லட்சத்துக்கு காங்கேயம் இன காளைகள், கன்றுகள், மாடுகள் விற்பனை செய்யப்பட்டது.