வேட்டவலம் அருகே, மூதாட்டி மர்மச்சாவு - கொலை செய்யப்பட்டாரா? போலீஸ் விசாரணை

வேட்டவலம்,

வேட்டவலத்தை அடுத்த கோணலூர் கிராமத்தை சேர்ந்தவர் அண்ணாமலை. ராணுவ வீரரான அவர் கடந்த சில ஆண்டுகளுக்கு முன்பு இறந்துவிட்டார். அவரது மனைவி சந்திரா (வயது 70). இவர்களுக்கு குழந்தைகள் இல்லாததால் சந்திரா தனியாக வசித்து வந்தார். இந்த நிலையில் நேற்று அவர் வீட்டில் மர்மமான முறையில் இறந்து கிடந்தார். மேலும் அவர் கழுத்தில் அணிந்திருந்த நகையும் காணவில்லை.

இதுகுறித்து தகவல் அறிந்ததும் உதவி போலீஸ் சூப்பிரண்டு கிரண்ஸ்ருதி மற்றும் போலீசார் சம்பவ இடத்திற்கு சென்று விசாரணை நடத்தினர். பின்னர் சந்திராவின் உடலை கைப்பற்றி பிரேத பரிசோதனைக்காக அரசு மருத்துவமனைக்கு அனுப்பி வைத்தனர்.

இதுதொடர்பாக வேட்டவலம் போலீசார் வழக்குப்பதிவு செய்து, நகைக்காக மூதாட்டி கொலை செய்யப்பட்டாரா? அல்லது எப்படி இறந்தார் என்பது குறித்து பல்வேறு கோணங்களில் விசாரணை நடத்தி வருகின்றனர்.

இந்த சம்பவம் அந்த பகுதியில் பரபரப்பை ஏற்படுத்தியது.