காசிமேடு மீன்பிடி துறைமுகத்தில் பட்டப்பகலில் ஓட, ஓட விரட்டி மீனவர் வெட்டிக்கொலை

திருவொற்றியூர்,

சென்னை திருவொற்றியூர் அப்பர் சாமி கோவில் தெருவை சேர்ந்தவர் நாராயணன் (வயது 29). மீனவர். நாராயணன் மீது கொலை முயற்சி வழக்கு உள்ளிட்ட குற்ற வழக்குகள் நிலுவையில் உள்ளன. இந்நிலையில் கீழ்ப்பாக்கம் அரசு மருத்துவமனையில் சிகிச்சை பெற்று வரும் தனது மனைவி கல்பனாவை நேற்று காலை நாராயணன் மனைவியை பார்த்து விட்டு காசிமேடு மீன்பிடி துறைமுகம் அருகே கடற்கரையில் அமர்ந்திருந்தார்.

அப்போது அங்கு கத்தி, அரிவாள் உள்ளிட்ட பயங்கர ஆயுதங்களுடன் வந்த 6 பேர் கொண்ட கும்பல் நாராயணனனை சுற்றி வளைத்தனர். இதனை கண்டு அதிர்ச்சி அடைந்த நாராயணன் உயிரை காப்பாற்றி கொள்ள அங்கிருந்து ஓடினார்.

ஆனாலும் அந்த கும்பல் நாராயணனை ஓட, ஓட விரட்டி சரமாரியாக வெட்டினர். இதில் தலை, கழுத்து, முதுகில் பலத்த வெட்டுக்காயம் அடைந்த நாராயணன் சம்பவ இடத்திலேயே ரத்த வெள்ளத்தில் பரிதாபமாக இறந்தார்.

எப்போதும் மக்கள் நடமாட்டம் அதிகமாக காணப்படும் காசிமேடு மீன்பிடி துறைமுகம் பகுதியில் பட்டப்பகலில் நடந்த இந்த கொலை சம்பவத்தால் அங்கு பெரும் பரபரப்பு ஏற்பட்டது.

இதுகுறித்து தகவல் அறிந்து சம்பவ இடத்திற்கு வந்த காசிமேடு மீன்பிடி துறைமுக போலீசார் கொலை செய்யப்பட்ட நாராயணன் உடலை மீட்டு, பிரேத பரிசோதனைக்காக அரசு ஸ்டான்லி மருத்துவமனைக்கு அனுப்பி வைத்தனர்.

மேலும் போலீஸ் விசாரணையில், கடந்த 3 மாதத்திற்கு முன்பு காசிமேடு சூரியநாராயணன் சாலை, அண்ணாநகர் கடற்கரைப்பகுதியில் விசைப்படகில் வைத்து நாராயணனின் தம்பி சுடர்மணி வெட்டிக்கொலை செய்யப்பட்டார்.

இதுதொடர்பாக திருவொற்றியூர் கரிமேடு பகுதியை சேர்ந்த 5 பேரை ஏற்கனவே போலீசார் கைது செய்து உள்ளனர். அவர்களில் சிலரை கடந்த சில நாட்களுக்கு முன்பு நாராயணன் பீர் பாட்டிலால் தாக்கினார். இந்த வழக்கில் கைது செய்யப்பட்ட நாராயணன் சில நாட்களுக்கு முன்பு சிறையிலிருந்து வெளிவந்த நிலையில், அவர் படுகொலை செய்யப்பட்டுள்ளார்.

முன்விரோதம் காரணமாக அவர் வெட்டிக் கொலை செய்யப்பட்டாரா? அல்லது வேறு ஏதாவது காரணம் உள்ளதா? என போலீசார் விசாரித்து வருகின்றனர். மேலும் தப்பியோடிய கொலையாளிகளை போலீசார் தேடிவருகின்றனர். காசிமேடு மீன்பிடி துறைமுகம் பகுதியில் தம்பி கொலை செய்யப்பட்ட மூன்று மாதத்தில் அண்ணனும் கொலை செய்யப்பட்ட சம்பவம் அதிர்ச்சியை ஏற்படுத்தியுள்ளது.