மரத்தில் மோட்டார் சைக்கிள் மோதி அண்ணன்-தம்பி பலி

காட்டுமன்னார்கோவில்:

கடலூர் மாவட்டம் காட்டுமன்னார்கோவில் அருகே உள்ள கண்டமங்கலம் சீப்லி தெருவை சேர்ந்தவர் அன்பழகன். இவருடைய மகன் அழகுராஜா(வயது 26). இவர் வெளிநாட்டில் வேலை பார்த்து வந்தார். கடந்த சில நாட்களுக்கு முன்பு அழகுராஜா, சொந்த ஊருக்கு வந்திருந்தார்.

இந்த நிலையில் அழகுராஜா, இவருடைய தம்பி விஜய்(19), உறவினர் ராஜதுரை(18) ஆகிய 3 பேரும் நேற்று காலை ஒரு மோட்டார் சைக்கிளில் காட்டுமன்னார்கோவிலில் இருந்து கண்டமங்கலம் கிராமத்துக்கு வந்து கொண்டிருந்தனர். மோட்டார் சைக்கிளை அழகுராஜா ஓட்டினார். 

ரெங்கநாதபுரம் சுடுகாடு அருகே வந்தபோது, அழகுராஜாவின் கட்டுப்பாட்டை இழந்த மோட்டார் சைக்கிள் சாலையோரம் இருந்த பனை மரத்தில் மோதியது. இதில் 3 பேரும் தூக்கி வீசப்பட்டு பலத்த காயமடைந்தனர். இவர்களை அக்கம்பக்கத்தினர் மீட்டு சிகிச்சைக்காக காட்டுமன்னார்கோவில் அரசு மருத்துவமனைக்கு கொண்டு சென்றனர். ஆனால் மருத்துவமனைக்கு வரும் வழியிலேயே அழகுராஜா பரிதாபமாக உயிரிழந்தார். 

விஜய், ராஜதுரை ஆகியோர் காட்டுமன்னார்கோவில் அரசு மருத்துவமனையில் அனுமதிக்கப்பட்டனர். அங்கு டாக்டர்கள் தீவிர சிகிச்சை அளித்தும் பலனின்றி விஜய் பரிதாபமாக இறந்தார்.  இதற்கிடையே ராஜதுரை மேல்சிகிச்சைக்காக சிதம்பரம் ராஜா முத்தையா மருத்துவக்கல்லூரி மருத்துவமனைக்கு அனுப்பி வைக்கப்பட்டார். அங்கு அவருக்கு டாக்டர்கள் தீவிர சிகிச்சை அளித்து வருகின்றனர்.

இதுகுறித்த புகாரின்பேரில் காட்டுமன்னார்கோவில் போலீசார் வழக்குப்பதிவு செய்து விசாரணை நடத்தி வருகின்றனர்.