விபத்தில் வாலிபர் பலி

பாடாலூர்:

பெரம்பலூர் மாவட்டம் அய்யலூர் கிராமத்தை சேர்ந்த துரைசாமியின் மகன் அஜித்(வயது 23). இவருக்கு சொந்தமான டிராக்டரில், வீட்டிற்கு தேவையான மண்ணை ஏற்றிக்கொண்டு வந்தார். அப்போது, எதிர்பாராத விதமாக கட்டுப்பாட்டை இழந்து பள்ளத்தில் டிராக்டர் இறங்கியது. இதனால் டிராக்டரில் இருந்து இறங்கிய அஜித், டிராக்டரின் டிப்பர் பள்ளத்தில் இறங்காமல் தடுப்பதற்கான முயற்சியில் ஈடுபட்டார். அப்போது அவர் மீது டிராக்டரின் சக்கரம் ஏறியதில், அவர் சம்பவ இடத்திலேயே பரிதாபமாக உயிரிழந்தார். இதுபற்றி தகவல் அறிந்த மருவத்தூர் போலீசார், அஜித்தின் உடலை கைப்பற்றி பிரேத பரிசோதனைக்காக அரசு மருத்துவமனைக்கு அனுப்பி வைத்தனர். மேலும் இது குறித்து வழக்குப்பதிந்து விசாரணை மேற்கொண்டு வருகின்றனர்.