தேன்கனிக்கோட்டை அருகே தண்ணீர் குடிக்க சென்றபோது கிணற்றில் தவறி விழுந்து தாய்-மகன் சாவு

தேன்கனிக்கோட்டை:

தேன்கனிக்கோட்டை அருகே தண்ணீர் குடிக்க சென்றபோது கிணற்றில் தவறி விழுந்து தாய்-மகன் இறந்தனர்.

கிருஷ்ணகிரி மாவட்டம் தேன்கனிக்கோட்டை அருகே உள்ள சென்னமாளம் ்கிராமத்தை சேர்ந்தவர் மாதேகவுடு. இவருடைய மனைவி ரத்தினம்மா (வயது  47). இவர்களது மகன் மாதேஷ் (26). இவர் மனநிலை பாதிக்கப்பட்டவர். மேலும் வாய் பேச முடியாத மாற்றுத்திறனாளி. 

இந்தநிலையில் நேற்று ரத்தினம்மா தனது மகன் மாதேசுடன் ஆடு மேய்க்க சென்றார். அப்போது தாகம் தணிக்க மாதேஷ் வீரபத்திரப்பா என்பவரின் தோட்டத்திற்கு சென்றபோது அவர் கால் தவறி அங்கிருந்த கிணற்றில் விழுந்தார்.  இதைப் பார்த்து அதிர்ச்சி அடைந்த ரத்தினம்மா மகனை காப்பாற்ற கூச்சல் போட்டவாறே கிணற்றில் குதித்தார். நீச்சல் தெரியாததால் அவர்கள் 2 பேரும் கிணற்றில் மூழ்கி இறந்தனர்.

இதுகுறித்து தகவல் அறிந்ததும் அக்கம் பக்கத்தினர் தளி போலீஸ் நிலையத்திற்கு தகவல் தெரிவித்தனர். அதன்பேரில் போலீசார் விரைந்து வந்து பொதுமக்கள் உதவியுடன் கிணற்றில் இருந்து தாய்-மகன் ஆகிய 2 பேரின் உடல்களை மீட்டு மேலே கொண்டு வந்தனர். அப்போது அங்கு திரண்டு இருந்த குடும்பத்தினர் மற்றும் உறவினர்கள் கதறி அழுதது உருக்கமாக இருந்தது.. 

இதையடுத்து போலீசார், இறந்த 2 பேரின் உடல்களையும் பிரேத பரிசோதனைக்காக தேன்கனிக்கோட்டை அரசு மருத்துவமனைக்கு அனுப்பி வைத்தனர். தாய்-மகன் கிணற்றில் விழுந்து இறந்தது தொடர்பாக தளி போலீஸ் சப்-இன்ஸ்பெக்டர் சிவராஜ் வழக்குப்பதிவு செய்து விசாரணை நடத்தி வருகிறார். இந்த சம்பவம் அந்த பகுதியில் சோகத்தை ஏற்படுத்தி உள்ளது.