தாயமங்கலம் முத்துமாரியம்மன் கோவில் திருவிழா ஒருவாரம் முன்னதாக நடத்த முடிவு

சிவகங்கை மாவட்டம் தாயமங்கலத்தில் உள்ள புகழ்பெற்ற முத்துமாரியம்மன் கோவிலில் ஒவ்வாரு ஆண்டும் பங்குனி திருவிழா நடைபெறும். இந்த ஆண்டு வருகிற 6-ந்தேதி சட்டசபை தேர்தல் நடைபெற இருப்பதால் திருவிழாவை முன்கூட்டியே நடத்துவது குறித்து கலெக்டர் அலுவலகத்தில் கலெக்டர் தலைமையில் ஆலோசனை கூட்டம் நடத்தப்பட்டது.இதில் இந்து சமய அறநிலையத்துறை இணை ஆணையாளர் தனபால், மாவட்ட கலெக்டரின் நேர்முக உதவியாளர் (பொது).ரத்தினவேல், பரம்பரை அறங்காவலர் வெங்கடேசன் செட்டியார் மற்றும் தாயமங்கலம், அதனைச்சுற்றியுள்ள முக்கியப்பிரமுகர்கள், மண்டகப்படிதாரர்கள் கலந்து கொண்டனர்.
கூட்டத்தில் கலெக்டர் பேசியதாவது:-
 இந்தாண்டு முத்துமாரியம்மன் கோவில் நிறைவு நாள்அன்று 6-ந்தேதி சட்டமன்ற பொதுத்தேர்தலுக்கான வாக்குப்பதிவு நடைபெற உள்ளது. தேர்தல் நன்னடத்தை விதிமுறைகள் நடைமுறையிலுள்ளதையொட்டியும், அதேபோல் கொரோனா நோய் தாக்குதல் தடுப்பு குறித்த பாதுகாப்பு நிலையை கருத்திற்கொண்டும் சுற்றுவட்டார ஊர் பொதுமக்கள் முழுஒத்துழைப்புடன் வழக்கம் போல் நடைபெறும். விழாவின் நாட்களைவிட ஒருவாரகாலம் முன்கூட்டியே திருவிழா நடத்த முடிவு செய்து விழாவிற்கான ஏற்பாடுகளை மேற்கொள்ளப்படவுள்ளன. அதன்படி 23-ந்தேதி காப்பு கட்டி திருவிழா தொடங்கி 30-ந்தேதி பொங்கல் விழாவும், 31-ந்தேதி தேரோட்டமும், 1-ந்தேதி பால்குட விழாவும், 2-ந்தேதி தீர்த்தவாரி விழாவும் நடக்கிறது.
இவ்வாறு அவர் கூறினார்.