வாகனம் மோதி முதியவர் பலி

சின்னதாராபுரம் அருகே உள்ள தொக்குப்பட்டி கிராமத்தை சேர்ந்தவர் முனியப்பன் (வயது 65). கொத்தனாரான இவர், கடந்த 11-ந்தேதி தொக்குப்பட்டி புதூரில் இருந்து தனது ஊரான தொக்குப்பட்டிக்கு சென்று கொண்டிருந்தார். அப்போது அந்த வழியாக வந்த அடையாளம் தெரியாத வாகனம் ஒன்று, முனியப்பன் ஓட்டி சென்ற மொபட் மீது மோதி விட்டு நிற்காமல் சென்று விட்டது. இதில் மொபட்டில் இருந்து தூக்கி வீசப்பட்ட முனியப்பன் படுகாயமடைந்தார். இதையடுத்து அந்த வழியாக சென்றவர்கள் படுகாயமடைந்த அவரை மீட்டு சிகிச்சைக்காக அரவக்குறிச்சி அரசு மருத்துவமனைக்கு அனுப்பி வைத்தனர். அங்கு சிகிச்சை பலனின்றி நேற்று முன்தினம் அதிகாலை முனியப்பன் பரிதாபமாக இறந்தார். இந்த விபத்து குறித்து சின்னதாராபுரம் போலீசார் வழக்குப்பதிவு செய்து விசாரணை நடத்தி வருகின்றனர்.