விழுப்புரம் மாவட்டத்தில் 7 சட்டமன்ற தொகுதிகளில் 25 பேர் வேட்புமனு தாக்கல்- மொத்தம் 43 மனுக்கள் பெறப்பட்டன

விழுப்புரம், 

தமிழக சட்டமன்ற தேர்தல் வாக்குப்பதிவு ஏப்ரல் 6-ந்தேதி நடைபெறுகிறது. இதையொட்டி வேட்பு மனுதாக்கல் கடந்த 12-ந்தேதி முதல் தொடங்கி நடந்து வருகிறது. 

இதில் 7 சட்டமன்ற தொகுதிகளை உள்ளடக்கிய விழுப்புரம் மாவட்டத்தில் முதல் நாளில் யாரும் வேட்பு மனு தாக்கல் செய்யவில்லை. 

இந்நிலையில் வேட்புமனு தாக்கலின் 2-ம் நாளான நேற்று அரசியல் கட்சியினரும் மற்றும் சுயேட்சை வேட்பாளர்களும் அந்தந்த தொகுதி தேர்தல் நடத்தும் அலுவலகத்திற்கு சென்று தேர்தல் நடத்தும் அதிகாரியிடம் வேட்புமனு தாக்கல் செய்தனர்.

விழுப்புரம் சட்டமன்ற தொகுதியில் அ.தி.மு.க. வேட்பாளர் சி.வி.சண்முகம், தி.மு.க. வேட்பாளர் இரா.லட்சுமணன், இவருக்கு மாற்று வேட்பாளராக அவரது மனைவி மகாலட்சுமி, நாம் தமிழர் கட்சி வேட்பாளர் செல்வம், 2 சுயேட்சை வேட்பாளர்கள் என்று ஆகிய 6 பேர் வேட்புமனு தாக்கல் செய்தனர். இவர்களில் தி.மு.க. வேட்பாளர் லட்சுமணன் கூடுதலாக 2 மனுக்களை தாக்கல் செய்துள்ளார்.

திண்டிவனம் சட்டமன்ற தொகுதியில் அ.தி.மு.க. வேட்பாளர் அர்ஜூணன், இவருக்கு மாற்று வேட்பாளராக கனகராஜ், தி.மு.க. வேட்பாளர் சீத்தாபதி, இவருக்கு மாற்று வேட்பாளராக அவரது கணவர் சொக்கலிங்கம், நாம் தமிழர் கட்சி வேட்பாளர் பேச்சிமுத்து ஆகிய 5 பேர் வேட்புமனு தாக்கல் செய்தனர். இவர்களில் சீதாபதி கூடுதலாக 3 மனுக்களையும், சொக்கலிங்கம் கூடுதலாக 3 மனுக்களையும் தாக்கல் செய்துள்ளனர்.

செஞ்சி சட்டமன்ற தொகுதியில் தி.மு.க. வேட்பாளர் மஸ்தான், இவருக்கு மாற்று வேட்பாளராக அவரது மனைவி சைதானிபீ, பா.ம.க. வேட்பாளர் ராஜேந்திரன், நாம் தமிழர் கட்சி வேட்பாளர் சுகுமார், சுயேட்சை வேட்பாளர் பிரபு ஆகிய 5 பேர் வேட்புமனு தாக்கல் செய்தனர். இவர்களில் மஸ்தான் கூடுதலாக 2 மனுக்களையும், சைதானிபீ கூடுதலாக 2 மனுக்களையும் தாக்கல் செய்துள்ளனர்.

விக்கிரவாண்டி சட்டமன்ற தொகுதியில் அ.தி.மு.க. வேட்பாளர் முத்தமிழ்செல்வன், தி.மு.க. வேட்பாளர் புகழேந்தி, நாம் தமிழர் கட்சி வேட்பாளர் ஷீபாஆஷ்மி, சுயேட்சை வேட்பாளர்கள் ராஜீவ்காந்தி என்கிற இளஞ்செழியன், காயத்திரி ஆகிய 5 பேர் வேட்புமனு தாக்கல் செய்தனர். இவர்களில் தி.மு.க. வேட்பாளர் புகழேந்தி மட்டும் கூடுதலாக 3 மனுக்களை தாக்கல் செய்துள்ளார்.

திருக்கோவிலூர் தொகுதியில் தி.மு.க. வேட்பாளர் பொன்முடி, நாம் தமிழர் கட்சி வேட்பாளர் முருகன் ஆகிய 2 பேர் வேட்புமனு தாக்கல் செய்தனர். இவர்களில் பொன்முடி மட்டும் கூடுதலாக 3 மனுக்களை தாக்கல் செய்துள்ளார்.

வானூர் தொகுதியில் அ.தி.மு.க. வேட்பாளர் சக்கரபாணியும், மயிலம் தொகுதியில் பா.ம.க. வேட்பாளர் சிவக்குமாரும் வேட்புமனு தாக்கல் செய்தனர்.

மொத்தத்தில் மாவட்டத்தில் உள்ள 7 சட்டமன்ற தொகுதிகளிலும் 25 வேட்பாளர்கள் 43 மனுக்களை தாக்கல் செய்துள்ளனர். இன்றும் (செவ்வாய்க்கிழமை) 3-வது நாளாக வேட்பு மனுக்கள் பெறப்படுகிறது.