கருப்பசாமி வேடம் அணிந்தவரிடம் இருந்து அரிவாள் பறிமுதல்

காரைக்குடி சட்டமன்றத்தொகுதியில் போட்டியிட நாம் தமிழர் கட்சி சார்பில் துரைமாணிக்கம் வேட்பு மனு தாக்கல் செய்துள்ளார். முன்னதாக அவர் ராம்நகர் அழகப்பா பூங்காவில் இருந்து கட்சி தொண்டர்களுடன் மாட்டுவண்டியில் கிராமத்து விவசாயி போல் வேட்டி,பனியன் அணிந்து தலையில் பச்சைத் துண்டு அணிந்து ஊர்வலமாக வந்தார். அப்போது தொண்டர் ஒருவர் வேட்பாளருக்கு முன்பு அரிவாளுடன் கருப்பசாமி வேடமிட்டு கோடாங்கி அடித்து குறி சொல்லி வந்தார்.
அப்போது தேவகோட்டை திருப்பத்தூர் சாலை மோசமாக இருக்கிறது. இதற்கு என்ன தீர்வு எனக்கூறி பொதுமக்கள் கேட்டபோது தேர்தல் முடிந்த பிறகு சாலை போடப்படும் என கூறினார். கோட்டாட்சியர் அலுவலகத்தில் பா.ஜனதா வேட்பாளர் மனு தாக்கல் செய்ததால், அங்கு வந்த நாம் தமிழர் கட்சியினருக்கும், பா.ஜனதாவினருக்கும் இடையே சலசலப்பு ஏற்பட்டது. உடனே அங்கு வந்த போலீசார் இருதரப்பினரையும் சமாதானப்படுத்தி, கருப்பசாமி வேடம் அணிந்தவரிடம் இருந்து அரிவாளை பறிமுதல் செய்தனர். இந்த சம்பவம் அப்பகுதியில் பரபரப்பை ஏற்படுத்தியது.