எல்லா சமுதாய மக்களுக்கும் சகோதரனாக செயல்படுவேன் அமைச்சர் கே.டி.ராஜேந்திரபாலாஜி பேச்சு

விருதுநகர்,

ராஜபாளையம் சட்டமன்றத்தொகுதியில் அதிமுக சார்பாக பால்வளத்துறை அமைச்சர் கே.டிராஜேந்திரபாலாஜி இரட்டை இலை சின்னத்தில் போட்டியிடுகின்றார். ராஜபாளையம் ஒன்றியத்தில் தளவாய்புரத்தில் 3வது நாளாக தேர்தல் பிரச்சாரத்தை தொடங்கினார். தொடர்ந்து செட்டியார்பட்டி, மேலவரகுணரமபுரம், அருள்புத்தூர், மீனாட்சிபுரம், முகவூர் காமராஜர் சிலை, முகவூர் கக்கன்காலனி, கோவிலூர், மேலூர் துரைச்சாமிபுரம், சொக்கநாதன்புத்தூர் மாரியம்மன்கோவில், சொக்கநாதன்புத்தூர்கீழூர் மாரியம்மன் கோவில், சோலைசேரி, கிருஷ்ணாபுரம் உட்பட பல்வேறு கிராமங்களில் அமைச்சர் கே.டி. ராஜேந்திரபாலாஜி தேர்தல் பிரச்சாரம் செய்து இரட்டை இலை சின்னத்திற்கு வாக்கு சேகரித்தார்.

அப்போது அமைச்சர் பேசும்போது, ஜெயலலிதா வழியில் நல்லாட்சி நடத்தி வரும் தமிழக முதல்வர் எடப்பாடி பழனிச்சாமி, துணை முதல்வர் பன்னீர்செல்வம் நல்லாட்சி மீண்டும் தொடர்ந்திட வாக்காள பெருமக்கள் இரட்டை இலை சின்னத்தில் வாக்களித்து என்னை மாபெரும் வெற்றிபெற செய்ய வைக்க வேண்டும்.  சிவகாசி சட்டமன்ற தொகுதியில் 10 ஆண்டுகளில் எல்லா சமுதாய மக்களின் நன்மதிப்பை பெற்று பணியாற்றி உள்ளேன்.

எந்த பிரச்சினையாக இருந்தாலும் என்னிடத்தில் கூறுவார்கள் நான் செய்து கொடுத்துள்ளேன். 

இதேபோன்றுதான் ராஜபாளையம் சட்டமன்ற தொகுதியிலும் கடந்த 10ஆண்டுகளில் ஏராளமான திட்டங்களை கொண்டு வந்துள்ளேன். சத்திரபட்டி ரயில்வே மேம்பாலம், தாமிரபரணி கூட்டுக்குடிநீர், பாதாள சாக்கடை திட்டம், புதிய சாலைகள் அமைத்து கொடுத்தது,  ராஜபாளையம் அரசு மருத்துவமனைக்கு ஹைடெக் வசதிகளுடன் கூடிய நவீன 108 ஆம்புலன்ஸ் புதிய சேவை, தரம் உயர்த்தப்பட்ட அரசு மருத்துவமனை என பல்வேறு திட்டங்களை கொண்டு வந்துள்ளேன். தாமிரபரணி கூட்டுக்குடிநீர் திட்டத்திற்காக சேத்தூரில் அடிக்கல் நாட்டி நான்தான் தொடங்கி வைத்தேன். கட்சிப் பாகுபாடின்றி வளர்ச்சித் திட்ட பணிகளை செய்து கொடுத்துள்ளேன். தனிப்பட்ட முறையிலும் ஏராளமான உதவிகள் செய்துள்ளேன். சமுதாய ரீதியாகவும் உதவி செய்துள்ளேன்.

நான்  ராஜபாளையம் தொகுதியில் போட்டியிடுவேன் என்று எண்ணிப் பார்க்கவே இல்லை. சிவகாசி உங்களது சொந்த தொகுதி என்றாலும் ராஜபாளையம் உங்களது சொந்தக்காரர் தொகுதி என்று என்னை இங்கு போட்டியிட கூறினார்கள். ராஜபாளையம் சட்டமன்ற தொகுதியில் போட்டியிட வேண்டும் என்று கூறி பல்வேறு சமுதாய மக்கள் என்னை தொடர்ந்து வலியுறுத்தி வந்தார்கள். சிவகாசியிலேயே இரண்டு முறை வெற்றி பெற்று விட்டீர்கள். இந்த முறை ராஜபாளையம் தொகுதியில் போட்டியிட வேண்டும் என்று வலியுறுத்தினார்கள். இறைவன் சித்தாந்தம் நான் இங்கு போட்டியிடுகின்றேன். தற்போது உங்களிடத்தில் நான் வாக்கு கேட்டு வந்துள்ளேன்.

கக்கன் காலனி பகுதிக்கு பாலம் அமைக்க வேண்டும் என்று கோரிக்கை வைத்துள்ளார்கள் அதை கண்டிப்பாக நிறைவேற்றி கொடுப்பேன். இந்தியா சுதந்திரம் அடைந்தபோது இந்திய சட்டத்தையே யார் நிறைவேற்ற வேண்டும் என்று பேசப்பட்ட போது அண்ணல் அம்பேத்கர்தான் சரியான நபர் என்று கூறி சட்டமேதை அம்பேத்காரிடம் பொறுப்பை ஒப்படைத்தனர். இரவு பகலாக உட்கார்ந்து இந்தியாவுடைய சட்டத்தை இயற்றிய மாமேதை அண்ணல் அம்பேத்கர் திருவுருவ சிலைக்கு முன்பு இருந்த உங்களிடம் இரட்டை இலை சின்னத்திற்கு வாக்கு சேகரிக்கின்றேன். அவர் எழுதிய சட்டத்தினால்தான் சாதாரண மனிதன் கூட பாரதப் பிரதமரை இன்று கேள்வி கேட்க முடிகின்றது. 

ராஜபாளையம் சட்ட மன்றத்தில் வெற்றி பெற்று எல்லா சமுதாய மக்களுக்கும் அண்ணனாக தம்பியாக பாடுபடுவேன். அனைத்து சமுதாய மக்களும் அண்ணன் தம்பியாக இருக்கும் வகையில் பாலமாக நான் செயல்படுவேன். மூத்தவர்களுக்கு மகனாகவும் இளையவர்களுக்கு அண்ணனாக சமநிலையில் இருப்பவர்களுக்கு நண்பனாக இருந்து உங்கள் வீட்டுப் பிள்ளையாக தொகுதியின் பாதுகாவலனாக நான் என்றைக்கும் இருப்பேன்.  ஒன்றை மட்டும் நான் உறுதியாக கூறுகிறேன். நிச்சயமாக தவறு செய்தவர்களுக்கு உடந்தையாக இருக்க மாட்டேன். தவறான பாதையில் நான் செல்லவே மாட்டேன். 

மனச்சாட்சிக்கு விரோதமான எந்தச் செயலையும் நான் செய்ய மாட்டேன்.  இந்துவாக இருந்தாலும் கிறிஸ்தவராக இருந்தாலும் முஸ்லிமாக இருந்தாலும் அனைத்து சமுதாய ஆன்மீக பணிகளுக்கு உறுதுணையாக இருப்பேன். இது ஒரு ஆன்மீக பூமி என்பதை நிரூபிக்கும் வகையில் என் செயல்பாடு இருக்கும். வாக்காளர்கள் அத்தனை பேரும் வரும் சட்டமன்றத் தேர்தலில் எனக்கு இரட்டை இலை சின்னத்தில் ஒட்டுமொத்தமாக வாக்களித்து 50 ஆயிரம் வாக்கு வித்தியாசத்தில் வெற்றி பெறச் செய்ய வைக்க வேண்டும் என்று பேசினார்.

தேர்தல் பிரச்சாரத்தில் ராஜபாளையம் அதிமுக நகர செயலாளர் ரானாபாஸ்கரராஜ், ஒன்றிய கழக செயலாளர்கள் குருசாமி, நவநத்தினம், விருதுநகர் மேற்கு  மாவட்ட அம்மா பேரவை செயலாளர் கிருஷ்ணராஜா, விருதுநகர் மேற்கு மாவட்ட இளைஞரணிச் செயலாளர் துரைமுருகேசன், சேத்தூர் நகர செயலாளர் பொன்ராஜபாண்டியன், செட்டியார்பட்டி நகர செயலாளர் அங்குத்துரைபாண்டியன், மாவட்ட வர்த்தக அணி செயலாளர் ராதாகிருஷ்ணன்ராஜா, விருதுநகர் கிழக்கு மாவட்ட மகளிரணி செயலாளர் கலைச்செல்வி, விருதுநகர் மேற்கு மாவட்ட மருத்துவ அணிச் செயலாளர் டாக்டர் விஜய்ஆனந்த்  மாவட்டக் கழக இணைச் செயலர் அழகுராணி, தகவல் தொழில்நுட்ப பிரிவு மதுரை மண்டல இணைச் செயலாளர் கருப்பசாமிபாண்டியன், மாவட்ட சிறுபான்மை பிரிவு செயலாளர் செய்யதுசுல்தான், விருதுநகர் மேற்கு மாவட்ட தகவல் தொழில்நுட்ப செயலாளர் பாண்டியராஜன் மற்றும் அதிமுக நிர்வாகிகள் கூட்டணி கட்சி நிர்வாகிகள் கலந்து கொண்டனர்.