வாழைநாரிலிருந்து பட்டுப்புடவை தயாரிக்கும் தொழிற்சாலை அமைக்கப்படும் அ.தி.மு.க. வேட்பாளர் கு.ப.கிருஷ்ணன் பேச்சு

ஜீயபுரம், 

திருச்சி ஸ்ரீரங்கம் சட்டமன்ற தொகுதியில் அ.தி.மு.க. வேட்பாளர் கு.ப.கிருஷ்ணன் ஸ்ரீரங்கம் சட்டமன்ற தொகுதியில் வாக்கு சேகரிப்பில் ஈடுபட்டு வருகிறார். இவர் நேற்று அந்தநல்லூர் ஊராட்சி ஒன்றியத்திலுள்ள பெட்டவாய்த்தலை பகுதியில் கீழஆரியம் பட்டியில் உள்ள மாரியம்மன் கோவிலில் சாமி கும்பிட்டு தனது தேர்தல் பிரசாரத்தை தொடங்கினார். அப்போது அவருக்கு அந்த பகுதியில் ஏராளமான பெண்கள் ஆரத்தி எடுத்தும், மலர்களை தூவியும் பட்டாசு வெடித்தும் வரவேற்றனர். அதனை தொடர்ந்து தேவஸ்தனம், எல்லக்கரை, பழையூர் மேடு, உள்ளிட்ட பகுதியில் வாக்கு சேகரிப்பில் ஈடுபட்டார். 

பின்னர் பெட்டவாய்த்தலை கடைவீதியில் அவர் பேசும்போது, அ.தி.மு.க. அரசின் வெற்றி சாதனையான 57 லட்சம் மாணவர்களுக்கு இலவச மடிக்கணினி திட்டத்தை கூறினார். இந்திய துணை கண்டங்களில் மேற்படிப்பிற்கான மாணவர் எண்ணிக்கையை உயர்த்தியது முதல்-அமைச்சர் எடப்பாடி பழனிசாமி அரசுதான். 1996-ம் ஆண்டு அமைச்சராக பொறுப்பேற்று இருந்த போது கீழ ஆரியம் பட்டியில் இருந்து பஸ் வசதியை ஏற்படுத்தி கொடுத்ததை தி.மு.க. ஆட்சியில் நிறுத்தி விட்டார்கள். 

மேலும் இந்த பகுதி மக்களுக்காக வீட்டுக்கொரு கழிப்பிட வசதி கட்டாயம் செய்து தரப்படும் என வாக்குறுதி அளித்தார். மேலும் இந்தபகுதியில் உள்ள பெண்கள், சிறு தொழில்களில் ஈடுபட்டு வருகின்றனர். எனவே இந்த பகுதியில் சிறு குறு தொழில்கள் மேம்பட அ.தி.மு.க. அரசு நிச்சயமாக வழிவகை மேற்கொள்ளும். இந்தப் பகுதி மக்களின் வாழ்க்கை வளம்பெற வாழை நாரிலிருந்து பட்டுப்புடவை தயாரிக்கும் தொழிற்சாலை பெட்டவாய்த்தலையில் அமைத்துக்கொடுக்கப்படும் என்று உறுதி அளித்தார்.

பின்னர், சிறுகமணி பேரூராட்சியில் பேசும் போது, இந்த பகுதியில் உள்ள பெண்கள் திருச்சியிலுள்ள கல்லூரிக்கு சென்று தான் படிக்கும் நிலை உள்ளது. எனவே இந்த பகுதியில் உள்ள பெண்கள் நலன் கருதி மகளிர்கலை அறிவியல் கல்லூரி தொடங்க நடவடிக்கை எடுக்கப்படும் என்றார். அதனை தொடர்ந்து, காவல்காரபாளையம், எஸ்.புதுகோட்டை, பெருகமணி, அணலை, திருப்பராய்த்துறை, கொடியாலம், புலிவலம், உள்ளிட்ட பல இடங்களில் வாக்கு சேகரித்தார். இந்த நிகழ்ச்சியில் ஒன்றிய செயலாளர்கள் அழகேசன், முத்துகருப்பன், பாரதீய ஜனதா கட்சியின் மண்டல் தலைவர் ஈஸ்வரன், உள்ளிட்ட கூட்டணி கட்சியை சேர்ந்த தொண்டர்கள் ஏராளமானோர் கலந்து கொண்டனர்.