கார் மோதி வாலிபர் சாவு

பனவடலிசத்திரம், மார்ச்:

வீரகேரளம்புதூர் தாலுகா ஊத்துமலை அருகே உள்ள வென்றிலிங்கபுரம் கிழக்கு தெருவை சேர்ந்தவர் சுப்பிரமணியன் மகன் மாரிச்செல்வம் (வயது 27). டிரைவராக வேலை பார்த்து வந்தார். இவர் தேவர்குளம் அருகே உள்ள மேசியாபுரம் கிராமத்தில் சங்கரன்கோவில் - நெல்லை செல்லும் சாலையில் உள்ள ஒரு டீக்கடையில் டீ குடித்துவிட்டு ரோட்டில் நடந்து வந்து கொண்டிருந்தார். அப்போது அந்த பகுதியில் வந்த கார் ஒன்று எதிர்பாராதவிதமாக மாரிச்செல்வத்தின் மீது மோதியது. இதில் சம்பவ இடத்திலேயே அவர் பரிதாபமாக இறந்தார். தகவல் அறிந்ததும் தேவர்குளம் போலீசார் வந்து மாரிச்செல்வத்தின் உடலை கைப்பற்றி நெல்லை அரசு ஆஸ்பத்திரிக்கு அனுப்பி வைத்தனர். இன்ஸ்பெக்டர் ராமர் வழக்குப்பதிவு செய்து விசாரணை நடத்தி வருகிறார்.