4 சட்டமன்ற தொகுதிகளுக்கான வேட்பாளர் செலவின கணக்குகள் நாளை முதல் ஆய்வு

கரூர்
கரூர் மாவட்ட தேர்தல் அலுவலரும், மாவட்ட கலெக்டருமான மலர்விழி வெளியிட்டுள்ள செய்திக்குறிப்பில் தெரிவித்திருப்பதாவது:-
தமிழக சட்டமன்ற தேர்தலில் கரூர் மாவட்டத்தில் போட்டியிடும் கரூர், குளித்தலை, அரவக்குறிச்சி, கிருஷ்ணராயபுரம்(தனி) ஆகிய 4 தொகுதிகளின் வேட்பாளர்கள் மற்றும் அவர்தம் அங்கீகரிக்கப்பட்ட முகவர்களால் செலவிடப்படும் தேர்தல் தொடர்பான செலவின கணக்குகள் தேர்தல் செலவின பார்வையாளர் பியூஸ்பாட்டியாலால் 3 கட்டங்களாக ஆய்வு மேற்கொள்கிறார்.
 அதன்படி நாளை(வெள்ளிக்கிழமை) முதல் கட்டமாகவும், 30-ந் தேதி 2-வது கட்டமாகவும் ஏப்ரல் மாதம் 3-ந் தேதி 3-வது கட்டமாகவும் கரூர் மாவட்ட கலெக்டர் அலுவலக கூட்ட அரங்கில் காலை 9 மணி முதல் மாலை 6 மணி வரை ஆய்வு மேற்கொள்கிறார். இந்த நாட்களில் சம்பந்தப்பட்ட வேட்பாளர்கள் மற்றும் அங்கீகரிக்கப்பட்ட முகவர்கள் தேர்தல் செலவு தொடர்பான பதிவேடுகள், ரசீதுகள், வங்கி புத்தகம் மற்றும் உரிய அனைத்து அசல் ஆவணங்களுடன் நேரில் ஆஜராக வேண்டும்.  இவ்வாறு அதில் அவர் தெரிவித்துள்ளார்.