திருக்கோவிலூர் அருகே 1,500 லிட்டர் சாராய ஊறல் பதுக்கல் போலீசார் தரையில் கொட்டி அழித்தனர்

திருக்கோவிலூர்

திருக்கோவிலூர் அருகே உள்ள வீரபாண்டி கிராமத்தில் தேர்தலின்போது பயன்படுத்துவதற்காக சாராய ஊறல் பதுக்கி வைக்கப்பட்டிருப்பதாக அரகண்டநல்லூர் போலீசாருக்கு ரகசிய தகவல் கிடைத்தது. அதன் பேரில் இன்ஸ்பெக்டர் ராமதாஸ் தலைமையில் போலீசார் வீரபாண்டி பெரிய ஏரி கரையை ஒட்டியுள்ள பாறைகள் அமைந்துள்ள பகுதியில் சோதனை நடத்தினர். அப்போது பாறைகளுக்கு நடுவே பிளாஸ்டிக் டிரம்களில் சுமார் 1,500 லிட்டர் சாராய ஊறலை மர்மநபர்கள் பதுக்கி வைத்திருப்பதை கண்டுபிடித்தனர். பின்னர் அவற்றை தரையில் கொட்டி போலீசார் அழித்தனர். இதன் மதிப்பு ரூ.50 ஆயிரம் ஆகும். மேலும் இதுகுறித்து போலீசார் வழக்குப்பதிவு செய்து சாராய ஊறலை பதுக்கி வைத்த மர்மநபர்களை வலை வீசிதேடி வருகிறார்கள்.