திருச்செங்கோடு அருகே மோட்டார்சைக்கிள் மீது பஸ் மோதி பெண் பலி மகன் படுகாயம்

எலச்சிபாளையம்:

திருச்செங்கோடு அருகே கொக்கராயன்பேட்டையைச் சேர்ந்தவர் ராஜா (வயது 54). இவர் மின்வாரியத்தில் பணிபுரிந்து வருகிறார்.

இவரது மனைவி ஜெகதாம்பாள் (50), மகன் பிரவீன் (23) ஆகிய 2 பேரும் மோட்டார்சைக்கிளில் திருச்செங்கோட்டில் இருந்து பள்ளிபாளையம் நோக்கி சென்றனர். கூட்டப்பள்ளி என்ற இடத்தில் சென்றபோது பின்னால் வந்த தனியார் பஸ் இவர்களது மோட்டார்சைக்கிள் மீது மோதியது. இதில் தூக்கி வீசப்பட்ட ஜெகதாம்பாள் படுகாயம் அடைந்து சம்பவ இடத்திலேயே பரிதாபமாக உயிரிழந்தார். பலத்த காயமடைந்த பிரவீனை அக்கம்பக்கத்தினர் மீட்டு திருச்செங்கோடு அரசு மருத்துவனைக்கு அனுப்பி வைத்தனர். அங்கு அவருக்கு தீவிர சிகிச்சை அளிக்கப்பட்டு வருகிறது. இதுகுறித்து திருச்செங்கோடு டவுன் போலீசார் வழக்குப்பதிவு செய்து விசாரணை நடத்தி வருகிறார்கள்.