1-ந் தேதி முதல், திருச்சி விமான நிலையத்தில் விமானங்கள் இறங்குவதற்கான தடை நேரம் மாற்றம்

செம்பட்டு, 

திருச்சி விமான நிலையத்தில் கடந்த சில மாதங்களாக ஓடுதளம் பலப்படுத்தும் பணி நடைபெற்று வருகிறது. இந்த பணியால் தற்போது காலை 10 மணி முதல் மாலை 6 மணி வரை விமானங்கள் இறங்குவதற்கு தடை விதிக்கப்பட்டிருந்தது. மேலும் திருச்சி விமான நிலையத்திற்கு வரும் விமானங்கள் மாலை 6 மணி முதல் மறுநாள் காலை 10 மணி வரை மட்டுமே இயக்கப்பட்டு வருகின்றன. இந்த நிலையில் இந்த தடை நேரம் மாற்றி அமைக்கப்பட்டு, வருகிற 1-ந் தேதி முதல் இரவு 11 மணி முதல் மறுநாள் காலை 8 மணி வரை விமானங்கள் இறங்குவதற்கு தடை விதிக்கப்பட்டுள்ளது. மேலும் ஓடுதளத்தை பலப்படுத்தும் பணி தொடர இருப்பதால் இந்த நேரம் மாற்றி அமைக்கப்பட்டுள்ளதாக விமான நிலைய அதிகாரிகள் தெரிவித்தனர். இந்த மாற்றம் மறு அறிவிப்பு வரும் வரை தொடரும் என்று தெரிகிறது.