தேர்தல் நாளன்று பயன்படுத்த 900 சக்கர நாற்காலிகள் தயார்

இது தொடர்பாக சிவகங்கை மாவட்ட கலெக்டர் மதுசூதன்ரெட்டி விடுத்துள்ள செய்திக்குறிப்பில் கூறியுள்ளதாவது:-
நடைபெற உள்ள சட்டமன்ற பொதுத்தேர்தலுக்கான வாக்குப்பதிவு வருகிற 6-ந்தேதி அன்று நடைபெறுகிறது. அன்றையதினம் வாக்குப்பதிவு மையங்களுக்கு வரும் மாற்றுத்திறனாளிகள் மற்றும் முதியோர்கள் சிரமமின்றி வாக்களிக்க செல்லும் ஏதுவாக சக்கரநாற்காலிகள் அமைத்துக்கொடுக்க இந்திய தோ்தல் ஆணையம் அறிவுறுத்தி உள்ளது.
அத்துடன் தற்போது கோவிட்- 19 காலத்தை கருத்தில் கொண்டு ஒவ்வொரு வாக்குப்பதிவு மையத்திற்கும் 15 வகையான பாதுகாப்பு உபகரணங்கள் பொது சுகாதாரத்துறையின் மூலம் வழங்கப்படுகிறது. ஒவ்வொரு மையத்திலும் செவிலியர் பயிற்சி பெற்ற ஒருவர் வாக்குப்பதிவு மையத்திற்கு வரும் ஒவ்வொரு வாக்காளரையும் வெப்பமானியின் மூலம் பரிசோதனை செய்து முகக்கவசம் மற்றும் கையுறை அணிந்து செல்வதை உறுதி செய்வார். அந்தவகையில் வாக்களிக்க வருகை தரும் மாற்றுத்திறனாளிகள் மற்றும் மூத்த குடிமக்கள் சிரமமின்றி வாக்களிக்க வாக்குச்சாவடி மையங்களுக்கு சக்கரநாற்காலிகள் வழங்கப்பட்டுள்ளன.
 மேலும் மாற்றுத்திறனாளிகளுக்கு தங்குதடையின்றி வாக்குச்சாவடி மையங்களுக்கு சென்று வாக்களிக்க ஏதுவாக சாய்வுதள வசதிகள், மாற்றுத்திறனாளிகளுக்கான தனி வரிசை, பார்வையற்ற வாக்காளர்கள் தோ்தலில் போட்டியிடும் வேட்பாளர்கள் பற்றிய விவரப்பட்டியலை எளிதில் அறிந்து கொள்ளும் விதத்தில் பிரெய்லி முறையில் அச்சடிக்கப்பட்ட படிவங்கள் போன்ற வசதிகள் ஏற்படுத்தப்பட்டுள்ளது. இவ்வாறு அதில் அவர் கூறியுள்ளார்.