105 வழக்குகளுக்கு சமரச தீர்வு

தேசிய சட்டப்பணிகள் ஆணையத்தின் உத்தரவுப்படி தமிழ்நாடு மாநில சட்டப்பணிகள் ஆணையத்தின் வழிகாட்டுதலின்படி சிவகங்கை மாவட்டத்தில் தேசிய மக்கள் நீதிமன்றம் நேற்று நடைபெற்றது. இதையொட்டி மாவட்டத்தில் 10 மக்கள் நீதிமன்றங்கள் அமைக்கப்பட்டு மாவட்டத்திலுள்ள அனைத்து நீதிமன்றங்களிலும் நிலுவையில் உள்ள சிவில் வழக்குகளும் சமரச குற்றவியல் வழக்குகளும், மோட்டார் வாகன விபத்து வழக்குகள், வங்கி கடன் நிலுவை சம்பந்தப்பட்ட நீதிமன்றத்தில் தாக்கல் செய்யப்படாத வழக்குகளும் விசாரணைக்கு எடுத்துக் கொள்ளப்பட்டன.
 இந்த நீதிமன்றத்தில் 102 குற்றவியல் வழக்குகளும், 38 காசோலை மோசடி வழக்குகள், 1,026 வங்கிக்கடன் வழக்குகளும், 377 மோட்டார் வாகன விபத்து நஷ்ட ஈடு வழக்கு, 26 குடும்ப பிரச்சினை சம்பந்தப்பட்ட வழக்குகளும் மற்றும் 290 சிவில் வழக்கு மொத்தம் 1,860 வழக்குகள் பரிசீலனைக்கு எடுத்துக் கொள்ளப்பட்டது. இதில் 97 வழக்குகளுக்கு சமரச தீர்வு காணப்பட்டது. இதன் மூலம் ரூ3 கோடியே 97 லட்சத்து 41 ஆயிரத்து 850 வழக்குதாரர்களுக்கு கிடைத்தன.
 இதேபோல வங்கிக்கடன் நிலுவை சம்பந்தப்பட்ட நீதிமன்றத்தில் தாக்கல் செய்யப்படாத வழக்குகளில் 250 வழக்குகள் பரிசீலனைக்கு எடுக்கப்பட்டது. இதில் 8 வழக்குகளில் தீர்வு காணப்பட்டு ரூ.8 லட்சத்து 85 ஆயிரத்து 20 வங்கிகளுக்கு வரவானது. இதற்கான ஏற்பாடுகளை சட்டப்பணிகள் ஆணைக்குழு நிர்வாக உதவியாளர்கள் மணிமேகலை, பானுமதி, விவேகானந்த், கோடீஸ்வரன் ஆகியோர் செய்து இருந்தனர். மொத்தம் 105 வழக்குகளுக்கு தீர்வு காணப்பட்டது.