தூத்துக்குடி மாநகராட்சி பகுதியில் கொரோனா தடுப்பூசி போடும் பணி தீவிரப்படுத்தபடும் நகர்நல அலுவலர் வித்யா தகவல்

தூத்துக்குடி மாநகராட்சி பகுதியில் கொரோனா தடுப்பூசி போடும் பணி தீவிரப்படுத்தப்படும் என மாநகராட்சி நகர்நல அலுவலர் வித்யா தெரிவித்துள்ளார்.

தூத்துக்குடி மாநகராட்சி பகுதியில் கொரோனா வைரஸ் பரவலை தடுக்க தீவிர நடவடிக்கை எடுக்கப்பட்டு வருகிறது. அதன்படி மாவட்ட கலெக்டர் செந்தில்ராஜ், மாநகராட்சி ஆணையாளர் சரண்யா அரி ஆகியோர் அறிவுறுத்தலின் பேரில், மாநகர பகுதிகளில் உள்ள வணிக வளாகங்கள், சினிமா தியேட்டர்கள், திருமண மண்டபங்களில் மாநகராட்சி அதிகாரிகள் குழுவினர் தீவிர ஆய்வு மேற்கொண்டு வருகின்றனர். அவர்கள் முறையாக வாடிக்கையாளர்கள் முககவசம் அணிய வேண்டும், கிருமி நாசினி கொண்டு கைகளை சுத்தம் செய்ய வேண்டும், சமூக இடைவெளியை கடைபிடிக்க வேண்டும் என்று அறிவுறுத்தி வருகின்றனர்.

அதே போன்று கொரோனா தடுப்பு விதிமுறை மீறல்களை கண்காணித்து அபராதம் விதிப்பதற்காக பிரத்யேகமாக 2 குழுக்கள் அமைக்கப்பட்டு உள்ளது. இந்த குழுவினர் மாநகரம் முழுவதும் ஆய்வு செய்து அபராதம் விதித்து வருகின்றனர். நேற்று முன்தினம் ஒரே நாளில் முககவசம் அணியாமல் வந்தவர்களுக்கு ரூ.24 ஆயிரத்து 200 அபராதம் விதிக்கப்பட்டு உள்ளது. பொதுவாக திருமண நிகழ்ச்சிகள், வங்கிகள், போக்குவரத்து மூலம் கொரோனா அதிகமாக பரவி வருவதாக தெரியவந்து உள்ளது. இதனால் அதிகாரிகள் கண்காணிப்பு பணியை தீவிரப்படுத்தி வருகின்றனர்.

இதுகுறித்து மாநகராட்சி நகர்நல அலுவலர் வித்யா கூறியதாவது:- 

தூத்துக்குடி மாநகராட்சி பகுதியில் கொரோனா தடுப்பூசி போடும் பணியை தீவிரப்படுத்த நடவடிக்கை எடுக்கப்பட்டு உள்ளது. மாநகர பகுதியில் 7 நகர்ப்புற சுகாதார நிலையங்களில், முள்ளக்காடு, கணேஷ்நகர், திரேஸ்புரம் ஆகிய 3 நகர்ப்புற சுகாதார நிலையங்களும் முன்மாதிரி மையமாக கொண்டு தடுப்பூசி போடப்படுகிறது. 

இந்த மையங்களில் காலை 10 மணி முதல் மாலை 4 மணி வரை தடுப்பூசி போடும் பணி நடக்கிறது. இங்கு கோவிஷீல்டு தடுப்பூசி போடப்பட்டு வருகிறது. அதிக அளவில் மக்களுக்கு தடுப்பூசி போடுவதற்கான விழிப்புணர்வு ஏற்படுத்தப்பட்டு வருகிறது.

தொழில் நிறுவனங்களில் 45 வயதுக்கு மேற்பட்டவர்களுக்கு தடுப்பூசி போடுவதற்கான நடவடிக்கை மேற்கொள்ளப்பட்டு உள்ளது. அதன்படி தூத்துக்குடி வ.உ.சி. துறைமுகம், என்.டி.பி.எல். அனல்மின்நிலையம், ஸ்டேட் வங்கி உள்ளிட்ட நிறுவனங்களில் உள்ளவர்களுக்கு தடுப்பூசி போடப்பட்டு வருகிறது. அதே போன்று மேலும் சில நிறுவனங்கள் தடுப்பூசி போடுவதற்கு விருப்பம் தெரிவித்து உள்ளன. அந்த நிறுவன ஊழியர்களுக்கும் விரைவில் தடுப்பூசி போடப்பட உள்ளது. இவ்வாறு அவர் தெரிவித்தார்.