மண்ணச்சநல்லூர் அருகே தேர்தல் தகராறில் கைகலப்பு: தி.மு.க., அ.தி.மு.க.வினர் 20 பேர் மீது வழக்கு

சமயபுரம், 

மண்ணச்சநல்லூர் ஊராட்சி ஒன்றியம் தத்தமங்கலம் அருகே உள்ள சாலபட்டியை சேர்ந்தவர் ஆதாளி. இவர் மண்ணச்சநல்லூர் ஒன்றிய அ.தி.மு.க. செயலாளராக உள்ளார். நேற்று முன்தினம் கட்சியினருடன் தனது வீட்டருகே அவர், நடந்து முடிந்த தேர்தல் குறித்தும், வெற்றிவாய்ப்பு குறித்தும் பேசிக்கொண்டு இருந்ததாக தெரிகிறது. அப்போது, அவ்வழியே தி.மு.க. பிரமுகர் வெற்றிச்செல்வன் தனது ஆதரவாளர்களுடன் சென்றுள்ளார்.

அப்போது, இரு தரப்பினருக்கும் இடையே தேர்தல் குறித்து வாக்குவாதம் ஏற்பட்டு, கைகலப்பாக மாறியது. இதுபற்றி தகவல் அறிந்த சிறுகனூர் போலீசார் சம்பவ இடத்திற்கு விரைந்துசென்று இருதரப்பினரையும் சமரசம் செய்தனர். பின்னர், இரு தரப்பிலும் கொடுத்த புகாரின்பேரில் அ.தி.மு.க.வை சேர்ந்த ஆதாளி உள்ளிட்ட10 பேர் மீதும், தி.மு.க.வை சேர்ந்த வெற்றிச்செல்வன் உள்ளிட்ட 10 பேர் மீதும் போலீசார் வழக்குப்பதிவு செய்து விசாரணை மேற்கொண்டு வருகின்றனர்.