சேலத்தில் வெவ்வேறு இடங்களில் எலக்ட்ரீசியன் உள்பட 3 பேர் தற்கொலை

சேலம்:

சேலத்தில் வெவ்வேறு இடங்களில் எலக்ட்ரீசியன் உள்பட 3 பேர் தற்கொலை செய்து கொண்டனர்.

சேலம் மணியனூர் பகுதியை சேர்ந்தவர் செல்வம் (வயது 41). எலக்ட்ரீசியன். இவரது மனைவி சரளாதேவி. கணவன், மனைவி இருவருக்கும் அடிக்கடி குடும்பத்தகராறு ஏற்பட்டு வந்ததாக தெரிகிறது. இந்த நிலையில் நேற்று முன்தினம் இரவு இருவருக்கும் தகராறு ஏற்பட்டது. இதில் வேதனை அடைந்த செல்வம் வீட்டில் தூக்குப்போட்டு தற்கொலை செய்து கொண்டார்.

சேலம் லைன்மேடு பகுதியை சேர்ந்தவர் செல்வராஜ் (29). இவர் வெள்ளிப்பட்டறையில் தொழிலாளியாக வேலை பார்த்து வந்தார். இந்த நிலையில் இவர் வீட்டில் யாரும் இல்லாத போது தூக்குப்போட்டு தற்கொலை செய்து கொண்டார்.  இந்த 2 சம்பவங்கள் குறித்து தகவல் அறிந்த அன்னதானப்பட்டி போலீசார் சம்பவ இடங்களுக்கு சென்று 2 பேரின் உடலை கைப்பற்றி பிரேத பரிசோதனைக்கு சேலம் அரசு ஆஸ்பத்திரிக்கு அனுப்பி வைத்தனர். பின்னர் வழக்குப்பதிவு செய்து அவர்கள் தற்கொலை செய்து கொண்டதற்கான காரணம் குறித்து விசாரணை நடத்தி வருகின்றனர்.

சேலம் குகை பகுதியை சேர்ந்தவர் ஆனந்தபாபு (35). இவர் நகைக்கடையில் ஊழியராக வேலை பார்த்து வந்தார். நேற்று முன்தினம் வீட்டில் தூக்குப்போட்டு தற்கொலை செய்து கொண்டார். தகவல் அறிந்த செவ்வாய்பேட்டை போலீசார் சம்பவ இடத்திற்கு சென்று ஆனந்தபாபு உடலை கைப்பற்றி பிரேத பரிசோதனைக்கு சேலம் அரசு ஆஸ்பத்திரிக்கு அனுப்பி வைத்தனர். பின்னர் வழக்குப்பதிவு செய்து அவர் தற்கொலை செய்து கொண்டதற்கான காரணம் குறித்து விசாரணை நடத்தி வருகின்றனர்.