மோட்டார் சைக்கிள் மோதி பெண் பலி

வெள்ளியணை
உப்பிடமங்கலம் அருகே உள்ள லிங்கத்தூர் ஆதிதிராவிடர் காலனியை சேர்ந்தவர் வீரம்மாள் (வயது 55). விவசாய கூலி தொழிலாளியான இவர் அதே பகுதியில் கூலி வேலைக்கு சென்றுவிட்டு, பின்னர் வீட்டுக்கு செல்வதற்காக எல்லைப்பாதை பகுதியில் புலியூர்-உப்பிடமங்கலம் சாலையை கடக்க முயன்றார். அப்போது புலியூரில் இருந்து உப்பிடமங்கலம் நோக்கி வந்த மோட்டார் சைக்கிள் எதிர்பாராதவிதமாக வீரம்மாள் மீது மோதியது. இதில் தூக்கி வீசப்பட்டு பலத்த காயமடைந்த வீரம்மாள் சம்பவ இடத்திலேயே இறந்தார். இதுகுறித்து தகவலறிந்த வெள்ளியணை போலீசார் சம்பவ இடத்திற்கு சென்று இறந்த வீரம்மாளின் உடலை மீட்டு பிரேத பரிசோதனைக்காக கரூர் அரசு மருத்துவக்கல்லூரி மருத்துவமனைக்கு அனுப்பி வைத்தனர். பின்னர் இதுகுறித்து வழக்குப்பதிவு செய்து விசாரணை மேற்கொண்டு வருகின்றனர்.