முழு ஊரடங்கால் கடைகள் அடைப்பு; சாலைகள் வெறிச்சோடின

தமிழகத்தில் கொரோனா பரவலை தடுக்க நேற்று முழு ஊரடங்கு கடைபிடிக்கப்பட்டது. சிவகங்கை மாவட்டத்திலும் முழு ஊரடங்கு கடைபிடிக்கப்பட்டது.
 காரைக்குடி, கோட்டையூர், பள்ளத்தூர், கானாடுகாத்தான், கண்டனூர், புதுவயல் பகுதிகளில் மருந்துக்கடைகள், பெட்ரோல் பங்குகள் தவிர அனைத்து கடைகளும் அடைக்கப்பட்டிருந்தன. ஒரு சில ஓட்டல்களில் அரசால் விதிக்கப்பட்ட நேரப்படி பார்சல் சேவைகள் தொடர்ந்தன. ஒருசில சரக்கு வாகனங்கள் ஓடின. மருத்துவ சேவைக்கான பணிகள் தொடர்ந்து நடைபெற்றன.
குறைந்தளவில்ஆள் நடமாட்டமும் இருந்தது. ஆங்காங்கே ஒருசிலர் இருசக்கர வாகனங்களில் சென்ற வண்ணம் இருந்தனர். அரசு உத்தரவுப்படி கோவில்கள், வழிபாட்டுத்தலங்கள் மூடப்பட்டிருந்ததால் குன்றக்குடி, ஜெயங்கொண்டான், கானாடுகாத்தான் பகுதிகளில் கோவில்கள் வாசலிலேயே மணமக்களும் அவர்களது குடும்பத்தினர்களும் மட்டுமே கலந்து கொண்ட நிலையில் திருமணங்கள் நடைபெற்றன.  புரோகிதர் இன்றி, மேளதாளம் இன்றி முக கவசம், கிருமிநாசினியுடன் திருமணங்கள் நடைபெற்றது.
காரைக்குடி நகராட்சி சுகாதார துறையினர் சாலையோர வியாபாரிகளிடம் கடந்த சில நாட்களாக மேற்கொண்ட பரிசோதனையில் வடமாநிலத்தை சேர்ந்த இருவருக்கு கொரோனா உறுதியானது தொடர்ந்து அவர்களை சிகிச்சைக்காக அரசு மருத்துவமனைக்கு அழைத்துச் சென்றனர். காரைக்குடி மற்றும் அதன் சுற்று வட்டார பகுதிகளில் போலீசார் தொடர்ந்து ரோந்து பணிகளை மேற்கொண்டு ஊரடங்கு உத்தரவினை நிறைவேற்றினர்.
எஸ்.புதூர்
முழு ஊரடங்கால் திருப்புவனத்தில் அனைத்து கடைகளும் அடைக்கப்பட்டிருந்தது. இதனால் மதுரை-ராமேசுவரம் தேசிய நெடுஞ்சாலை, நரிக்குடி சாலை, சந்தைப்பகுதி, கீழரத வீதி, திருப்புவனம்புதூர் உள்ளிட்ட அனைத்து பகுதிகளும் மக்கள் நடமாட்டம் இன்றி வெறிச்சோடி காணப்பட்டது. சிங்கம்புணரியிலும் கடைகள் அடைக்கப்பட்டு இருந்தன.
சாலைகள் வெறிச்சோடி காணப்பட்டன. முழு ஊரடங்கால் பொதுமக்கள் வீட்டுக்குள் முடங்கி கிடந்தனர்.