கொந்தகையில் 2-வது முதுமக்கள் தாழியில் மண்டை ஓடு, எலும்புகள் கண்டெடுப்பு

சிவகங்கை மாவட்டம், கீழடியில் 7-ம் கட்ட அகழ்வாராய்ச்சி பணிகள் நடந்து வருகிறது. கொந்தகை, அகரத்திலும் இந்த பணி நடக்கிறது. கொந்தகையில் முதலாவது குழியில் 2 முதுமக்கள் தாழி கண்டுபிடிக்கப்பட்டன. அதில் ஒரு முதுமக்கள் தாழியில் மனித மண்டை ஓடு, விலா எலும்புகள், கை, கால் எலும்புகள், மூட்டு எலும்புகள், இரும்பு வாள், கூம்பு வடிவ 2 மண் கிண்ணங்கள் இருந்தது கண்டறியப்பட்டது. இரும்பு வாள் இருந்ததால் முதுமக்கள் தாழியில் இறந்தவர் போர் வீரனாக இருக்கலாம் என கருதப்பட்டது. இந்த எலும்புகள் அனைத்தும் மரபணு சோதனைக்கு அனுப்ப முடிவு செய்துள்ளனர். மரபணு சோதனைக்கு பிறகே இறந்தவர் எந்த நூற்றாண்டு காலத்தில் வாழ்ந்தார் என்ற விவரம் தெரியவரும்.
இந்த நிலையில் நேற்று முன்தினம் 2-வது முதுமக்கள் தாழியை ஆய்வு செய்த போது போதிய வெளிச்சம் இன்மை காரணத்தால் அந்த பணி நிறுத்தப்பட்டது. நேற்று அந்த பணி மீண்டும் தொடங்கியது. 2-வது முதுமக்கள் தாழியில் மண்டை ஓடு, வாயில் உள்ள தாடைப்பகுதி மற்றும் பல எலும்புகள் எடுக்கப்பட்டன. இவையும் மரபணு சோதனைக்கு அனுப்பப்பட உள்ளது. தொடர்ந்து அகழாய்வு பணி நடக்கிறது.