ரூ.2 தகராறில் வாலிபரை பிளேடால் வெட்டிய கேண்டீன் ஊழியர் கைது

அம்பர்நாத், 

தானே மாவட்டம் அம்பர்நாத் பகுதியை சேர்ந்தவர் திலிப் மோரே (வயது28). இவரது நண்பர் பாந்து கோரே(30). இவர்கள் இருவரும் சம்பவத்தன்று அம்பர்நாத் ரெயில் நிலையத்தில் உள்ள கேண்டீனில் சமோசா சாப்பிட சென்றனர். அப்போது, கேண்டீன் ஊழியர் குசாவா என்பவர் அவர்களிடம் ரூ.10-ஐ பெற்றுக்கொண்டு சமோசா கொடுத்தார். இதன் பின்னர் மீதி ரூ.2-ஐ திலிப் மோரே கேட்டு உள்ளார். இதற்கு குசாவா ரூ.2-ஐ திருப்பி தரவில்லை என கூறப்படுகிறது. இதனால் அவர்களுக்கு இடையே வாக்குவாதம் ஏற்பட்டது.

இதில், ஆத்திரம் அடைந்த குசாவா கேண்டீனில் இருந்த பிளேடை எடுத்து திலிப் மோரேவை வெட்டியுள்ளார். இதில், காயம் அடைந்த அவர் ரத்தம் வழிந்தோடிய நிலையில் அங்குள்ள ரெயில்வே போலீசில் புகார் அளித்தார். இந்த புகாரின்பேரில் போலீசார் வழக்கு பதிவு செய்து கேண்டீன் ஊழியர் குசாவவை கைது செய்து விசாரணை நடத்தி வருகின்றனர்.