நெல்லை அருகே மோட்டார் சைக்கிளில் இருந்து தவறி விழுந்து பெண் சாவு

நெல்லை:

தூத்துக்குடி மாவட்டம் கயத்தாறு அருகே உள்ள பணிக்கர்குளத்தை சேர்ந்தவர் பண்ணைசாமி. இவருடைய மனைவி துரைச்சி (வயது 40). இவர் நேற்று முன்தினம் தனது மூத்த மருமகன் லட்சுமண பாண்டியுடன், மோட்டார் சைக்கிளில் நெல்லை தாழையூத்து அருகே கரையிருப்பில் உள்ள தனது இளைய மகள் வீட்டிற்கு சென்று கொண்டிருந்தார். மோட்டார் சைக்கிள் தாழையூத்து பகுதியில் சென்று கொண்டிருந்தபோது வேகத்தடையில் ஏறி இறங்கியது.

அப்போது எதிர்பாராதவிதமாக பின்னால் இருந்த துரைச்சி, மோட்டார் சைக்கிளில் இருந்து தவறி கீழே விழுந்தார். இதில் பலத்த காயமடைந்த அவரை அருகில் இருந்தவர்கள் மீட்டு சிகிச்சைக்காக பாளையங்கோட்டை ஐகிரவுண்டு அரசு ஆஸ்பத்திரியில் சேர்த்தனர். ஆனால் அங்கு சிகிச்சை பலனின்றி துரைச்சி நேற்று பரிதாபமாக இறந்தார். இதுகுறித்து தாழையூத்து போலீசார் வழக்குப்பதிவு செய்து விசாரணை நடத்தி வருகின்றனர்.