இஸ்ரோவில் இருந்து தூத்துக்குடி அரசு ஆஸ்பத்திரிக்கு 5½ டன் ஆக்சிஜன் அனுப்பி வைப்பு

தூத்துக்குடி:

தமிழகத்தில் கொரோனா தொற்று 2-வது அலை வேகமாக பரவி வருகிறது. கொரோனாவால் ஆஸ்பத்திரிகளில் சிகிச்சை பெறும் நோயாளிகளுக்கு நுரையீரல் பாதிப்பு அதிகம் இருந்தால் அவர்களுக்கு ஆக்சிஜன் தேவைப்படுகிறது.  ஆனால், நாடு முழுவதும் கொரோனா நோயாளிகள் அதிகரித்த வண்ணம் இருப்பதால், ஆக்சிஜன் சிலிண்டர் தட்டுப்பாடாக உள்ளது. பல இடங்களில் ஆக்சிஜன் கிடைக்காமல் நோயாளிகள் இறக்கும் சூழ்நிலையும் ஏற்பட்டுள்ளது.

இந்நிலையில் நெல்லை மாவட்டம் பணகுடி அருகே உள்ள காவல்கிணறு இஸ்ரோ மையத்தில் கொேரானா நோயாளிகளுக்காக ஆக்சிஜன் உற்பத்தி செய்யப்பட்டு தமிழ்நாடு மருத்துவ கழகத்திற்கு அனுப்பப்படுகிறது. அவர்கள் ஆக்சிஜன் எந்த பகுதிக்கு அதிகமாக தேவை? என்பதை அறிந்து அந்த பகுதிக்கு அனுப்பி வைக்கிறார்கள். அதன்படி நேற்று தூத்துக்குடி அரசு ஆஸ்பத்திரிக்கு டேங்கர் லாரியில் 5½ டன் ஆக்சிஜன் அனுப்பி வைக்கப்பட்டது.