நாட்டார் கால்வாய்க்கு வைகையில் வரும் உபரி நீரை திறந்து விட வேண்டும்

மானாமதுரை

மானாமதுரை அருகே உள்ள நாட்டார் கால்வாய்க்கு வைகையில் வரும் உபரி நீரை திறந்து விட வேண்டும் என 16 கிராமமக்கள் கோரிக்கை விடுத்துள்ளனர்.

மானாமதுரை அருகே கிளங்காட்டூர், அன்னவாசல், எம்.கரிசல்குளம், அரிமண்டபம், தீயனுர், மங்கையேந்தால் உள்ளிட்ட 16 கிராமங்கள் மழைமறைவுப் பகுதிகளாக உள்ளன. அப்பகுதி மக்களின் தொடர் போராட்டத்தை அடுத்து 30 ஆண்டுகளுக்கு முன்பு கிருங்காக்கோட்டை அருகே வைகை ஆற்றில் இருந்து நாட்டார் கால்வாய் அமைக்கப்பட்டது. இக்கால்வாய் மூலம் 16 பெரிய கண்மாய்கள், 25 சிறிய கண்மாய்கள், 25-க்கும் மேற்பட்ட குளங்கள் பயன் பெறுகின்றன. மொத்தம் 20 ஆயிரம் ஏக்கருக்கு மேல் பாசன வசதி பெறுகின்றன.

கடந்த 5 ஆண்டுகளுக்கு முன்பு, விவசாயிகளே சொந்தமாக ரூ.3 லட்சத்தில் கால்வாயை தூர்வாரினர். அதன்பிறகு கால்வாய் முழுவதும் சீமைக்கருவேல மரங்கள், புதர்கள் மண்டியதால், மீண்டும் ரூ.1 கோடியில் கால்வாய் தூர்வாரப்பட்டது. இதனை முன்னாள் அமைச்சர் பாஸ்கரன், கலெக்டராக பணியாற்றிய ஜெயகாந்தன் ஆகியோர் தொடங்கி வைத்தனர். ஆனால், இதுவரை இக்கால்வாயில் வைகை ஆற்றில் இருந்து தண்ணீர் திறந்துவிடப்படவில்லை. 

மேலும் 2019-ல் மானாமதுரையில் நடந்த இடைத்தேர்தல் பிரசாரத்தின்போது, முன்னாள் முதல்-அமைச்சர் எடப்பாடி பழனிசாமி, நாட்டார் கால்வாயில் தண்ணீர் திறக்கப்படும் என்று வாக்குறுதி அளித்தார். அதுவும் நிறைவேற்றபடவில்லை. கடந்த டிசம்பர், ஜனவரி மாதங்களில் சிவகங்கை மாவட்டத்தில் பலத்த மழை பெய்தும் ஒரு சில கண்மாய்களே நிரம்பின. நச்சோடை உள்ளிட்ட கண்மாய்கள் வறண்டு கிடக்கின்றன. 

வைகை அணை நிரம்பி வரும் நிலையில், தற்போது பெய்த மழையாால் வைகை ஆற்றில் வெள்ளப்பெருக்கு ஏற்பட்டு உள்ளது. எனவே நாட்டார் கால்வாய்க்கு வைகையில் வரும் உபரி நீரை திறந்து விட வேண்டும் என அப்பகுதி 16 கிராமங்களை சேர்ந்த மக்கள் வலியுறுத்தி உள்ளனர்.

இதுகுறித்து நாட்டார் கால்வாய் பாசன சங்கத் தலைவர் துபாய் காந்தி கூறியதாவது:- 

16 கிராமங்களில் பெரும்பாலான இடங்களில் நிலத்தடி நீர் உவர்ப்புடன் உள்ளது. அதனால் முழுமையாக கண்மாய் நீரை நம்பியே விவசாயம் செய்கின்றனர். எங்கள் பகுதி மழை மறைவுப் பகுதி என்பதால் கண்மாய் தண்ணீர் வரத்து இருக்காது. இதனால் விவசாயம் பாதிக்கப்பட்டது. இதையடுத்து எங்களது கோரிக்கையை ஏற்று நாட்டார் கால்வாய் அமைக்கப்பட்டது. ஆனால் கால்வாயில் வைகை தண்ணீர் வந்ததில்லை. இதனால் 30 ஆண்டுகளில் பலர் விவசாயத்தைக் கைவிட்டு வெளியூர்களுக்கு சென்றுவிட்டனர். வைகை தண்ணீர் வந்தால் மீண்டும் விவசாயம் தழைக்கும். தற்போது வைகை அணை நிரம்பி வருவதால் வைகை ஆற்றில் தண்ணீர் திறக்க வாய்ப்புள்ளது. அப்போது உபரி நீராவது நாட்டார் கால்வாயில் வரும் வகையில் வைகை அணையை திறக்க நடவடிக்கை எடுக்க வேண்டும் என்று கூறினார்.

மேலும் இந்த சட்டமன்ற தேர்தலில் தி.மு.க. தலைவர் மு.க.ஸ்டாலின், கனிமொழி, உதயநிதி ஸ்டாலின் ஆகியோர் தேர்தல் பிரசாரத்தின்போது நாட்டார் கால்வாய் திட்டம் கண்டிப்பாக நிறைவேற்றப்படும் என உறுதி அளித்தனர். இந்த தொகுதி தி.மு.க. வேட்பாளர் தமிழரசி நான் வெற்றி பெற்றவுடன் நாட்டார் கால்வாய் திட்டம் செயல்படுத்த நடவடிக்கைகள் எடுக்கப்படும் என உறுதியளித்தார். தற்போது தி.மு.க. வெற்றி பெற்று இருப்பதால் இத் திட்டத்தை தி.மு.க. நிறைவேற்றும் என நம்பிக்கையில் நாட்டார் கால்வாய் விவசாயகள் எதிர்பார்த்து காத்திருக்கின்றனர்.