மாட்டு வண்டிகளில் மணல் கடத்திய 3 பேர் கைது

ஆவூர், மே.15-
மண்டையூர் போலீஸ் சப்-இன்ஸ்பெக்டர் ராமச்சந்திரன் தலைமையிலான போலீசார் நேற்று ரோந்து பணியில் ஈடுபட்டிருந்தனர். அப்போது வங்காரம்பட்டி கிராமத்தின் வழியாக வந்த ஒரு மாட்டு வண்டியை போலீசார் தடுத்து நிறுத்தி சோதனையிட்டதில் அப்பகுதியில் உள்ள கோரையாற்றில் இருந்து மணல் அள்ளி கடத்தி வந்தது தெரியவந்தது. இதையடுத்து அரை யூனிட் மணலுடன் மாட்டு வண்டியை பறிமுதல் செய்த போலீசார் மணல் கடத்திய முள்ளிப்பட்டி கிராமத்தைச் சேர்ந்த பூசை (வயது 40) என்பவரை கைது செய்தனர்.
இதேபோல் மாத்தூர் போலீஸ் சப்-இன்ஸ்பெக்டர் செவந்தி தலைமையிலான போலீசார் நேற்று ரோந்து பணியில் ஈடுபட்டிருந்தனர். அப்போது விராலிமலை தாலுகா துலுக்கம்பட்டி அருகே வந்த 2 மாட்டு வண்டிகளை தடுத்து நிறுத்தி சோதனை நடத்தியதில் அப்பகுதியில் உள்ள கோரையாற்றில் இருந்து மணல் அள்ளி கடத்தி வந்தது தெரியவந்தது. இதையடுத்து ஒரு யூனிட் மணலுடன் 2 மாட்டு வண்டிகளையும் போலீசார் பறிமுதல் செய்தனர். மேலும் மாத்தூர் போலீசார் இதுகுறித்து வழக்குப்பதிவு செய்து மணல் கடத்திய துலுக்கம்பட்டி கிராமத்தை சேர்ந்த சின்னத்துரை (58), மணி (50) ஆகிய 2 பேரையும் கைது செய்தனர்.