கொரோனா நோயாளிகளை உரிய நேரத்தில் அரசு ஆஸ்பத்திரிக்கு அனுப்ப வேண்டும்-தனியார் டாக்டர்களுக்கு கலெக்டர் வேண்டுகோள்

சிவகங்கை மாவட்ட பொது சுகாதாரத்துறையின் மூலம் கொரோனாவை கட்டுப்படுத்துவது குறித்து மேற்கொள்ளப்பட்டு வரும் பணிகள் தொடர்பாக தனியார் மருத்துவமனை டாக்டர்கள் பங்கேற்ற ஆலோசனைக்கூட்டம் கலெக்டர் அலுவலகத்தில் நடைபெற்றது. கூட்டத்துக்கு கலெக்டர் மதுசூதன்ரெட்டி. தலைமை தாங்கி பேசியதாவது:-
கடைசி நேரத்தில் அனுப்ப கூடாது

கொரோனா நோயாளிகளை கடைசி நேரத்தில் அரசு மருத்துமனைகளுக்கு அனுப்பி வைக்ககூடாது. உரிய நேரத்தில் மேல் சிகிச்சைக்கு அனுப்ப வேண்டும். தனியார் டாக்டர்கள் நோயாளிகளை மானாமதுரை மற்றும் சிங்கம்புணரி அரசு மருத்துவமனைகளுக்கு காலை 7.30 மணி முதல் 5 மணி வரை அனுப்பலாம்.
மேலும் கொரோனா பரிசோதனைகள் அனைத்து ஆரம்ப சுகாதார நிலையங்கள், அரசு மருத்துவமனைகள் மற்றும் முகாம்கள் ஏற்பாடு செய்து நடத்தப்பட்டு வருகின்றன. தங்கள் மருத்துவ நிலையங்களில் கொரோனா நோய் பற்றிய நலக்கல்வியை அளித்து, கொரோனா நோய் பரிசோதனை மற்றும் தடுப்பூசி குறித்து அறிவுறுத்த வேண்டும்.   தங்களிடம் சிகிச்சைக்கு வரும் காய்ச்சல் நோயாளிகள் மற்றும் கொரோனா நோய் அறிகுறிகள் உள்ள நபர்களின் பட்டியலை பொது சுகாதாரத்துறைக்கு அனுப்பி வைக்க வேண்டும். மேலும் சிவகங்கை கலெக்டர் அலுவலகத்தில் 24 மணி நேரம் பணியாற்றும் கட்டுப்பாட்டு அறைஎண்: 1077 மற்றும் 18004259456 ஆகியவற்றிற்கு தகவல் தெரிவிக்கலாம்.
இவ்வாறு அவர் கூறினார்.
 இக்கூட்டத்தில் இணை இயக்குனர் (மருத்துவம்) இளங்கோ மகேஸ்வரன், துணை இயக்குனர் (சுகாதாரம்) யசோதாமணி, மற்றும் தனியார் மருத்துவமனை டாக்டர்கள் கலந்து கொண்டனர்.